jab tak abr-e-ishq na barsa

jab tak abr-e-ishq na barsā

husn shu.ūr-e-zāt ko tarsā

niiñd meñ bhī jaarī rahtā hai

paañv meñ hai jo ek safar sā

mere saath rahā hai har pal

us ke kho jaane kā Dar sā

saarī duniyā ghuum aa.ī huuñ

chain na paayā maiñ ne ghar sā

dil kī vahshat sahrā jaisī

dariyā merī chashm-e-tar sā

ug aaya hai sahn meñ mere

dard kā ik chhitnār shajar sā

vaqt kī chup meñ DhūñD rahī huuñ

koī pal ik achchhī ḳhabar sā

chashm-e-'sadaf' meñ tair rahā hai

terī yaad kā ek guhar sā

jab tak abr-e-ishq na barsa

husn shuur-e-zat ko tarsa

nind mein bhi jari rahta hai

panw mein hai jo ek safar sa

mere sath raha hai har pal

us ke kho jaane ka Dar sa

sari duniya ghum aai hun

chain na paya main ne ghar sa

dil ki wahshat sahra jaisi

dariya meri chashm-e-tar sa

ug aaya hai sahn mein mere

dard ka ek chhitnar shajar sa

waqt ki chup mein DhunD rahi hun

koi pal ek achchhi KHabar sa

chashm-e-'sadaf' mein tair raha hai

teri yaad ka ek guhar sa