jab tak charagh-e-sham-e-tamanna jale chalo

jab tak charāġh-e-shām-e-tamannā jale chalo

do-chār hī qadam hai ye rasta chale chalo

is had ke ba.ad koī nahīñ darmiyāñ meñ had

tai kar chuke ho aur jo sab marhale chalo

be-ḳhvāb ''ḳhūn-āñkh'' meñ dafnā ke zaḳhm-e-ḳhvāb

milne ko hai sahar se ye shab bhī gale chalo

shāyad vo DhūñDhtā ho tumheñ jis kī khoj hai

chehre pe jazb-e-dil ke ujāle male chalo

haiñ bādbāñ shikasta muḳhālif havā magar

jab tak na dil meñ aas kā sūraj Dhale chalo

phir kaun naaz us ke uThā.egā bazm meñ

tanhā.iyoñ ko apne hī ham-rāh le chalo

āñkhoñ meñ ḳhvāb aag ragoñ meñ javān azm

'shahzād' ab kahāñ haiñ vo sab silsile chalo

jab tak charagh-e-sham-e-tamanna jale chalo

do-chaar hi qadam hai ye rasta chale chalo

is had ke baad koi nahin darmiyan mein had

tai kar chuke ho aur jo sab marhale chalo

be-KHwab KHun-ankh mein dafna ke zaKHm-e-KHwab

milne ko hai sahar se ye shab bhi gale chalo

shayad wo DhunDhta ho tumhein jis ki khoj hai

chehre pe jazb-e-dil ke ujale male chalo

hain baadban shikasta muKHalif hawa magar

jab tak na dil mein aas ka suraj Dhale chalo

phir kaun naz us ke uThaega bazm mein

tanhaiyon ko apne hi ham-rah le chalo

aankhon mein KHwab aag ragon mein jawan azm

'shahzad' ab kahan hain wo sab silsile chalo