jab tak KHayal-o-KHwab ke KHanon mein kuchh na tha

jab tak ḳhayāl-o-ḳhvāb ke ḳhānoñ meñ kuchh na thā

merā maqām mere bayānoñ meñ kuchh na thā

tārīkiyoñ se jhāñktī rahtī thī raushnī

lekin mirī nazar ke ḳhazānoñ meñ kuchh na thā

zarre bhī āftāb the jab aañkh band thī

āñkheñ khulīñ to donoñ jahānoñ meñ kuchh na thā

mukhḌoñ ke moh jism ke jaadū nazar kī aañch

is ke sivā havas kī dukānoñ meñ kuchh na thā

har shaḳhs ik pukār thā har chīḳh ik savāl

tahzīb-o-āgahī kī azānoñ meñ kuchh na thā

pinhāñ thiiñ ghan-garaj meñ mukammal ḳhamoshiyāñ

merī samā'atoñ ke ḳhazānoñ meñ kuchh na thā

dīvār-o-dar harīf-e-mah-o-mehr the magar

dekhā to ḳhvāhishoñ ke makānoñ meñ kuchh na thā

har samt ek dhund sī thī rasm-o-rāh kī

merā vujūd mere zamānoñ meñ kuchh na thā

be-chehra ik ḳhayāl thā be-samt ik safar

aur merī justujū ke Thikānoñ meñ kuchh na thā

me'yār mere apne the apne mire usuul

dam varna besh-o-kam ke fasānoñ meñ kuchh na thā

'vasfī' hayāt-o-maut ke Takrāo kā javāb

maflūj falsafoñ kī zabānoñ meñ kuchh na thā

jab tak KHayal-o-KHwab ke KHanon mein kuchh na tha

mera maqam mere bayanon mein kuchh na tha

tarikiyon se jhankti rahti thi raushni

lekin meri nazar ke KHazanon mein kuchh na tha

zarre bhi aaftab the jab aankh band thi

aankhen khulin to donon jahanon mein kuchh na tha

mukhDon ke moh jism ke jadu nazar ki aanch

is ke siwa hawas ki dukanon mein kuchh na tha

har shaKHs ek pukar tha har chiKH ek sawal

tahzib-o-agahi ki azanon mein kuchh na tha

pinhan thin ghan-garaj mein mukammal KHamoshiyan

meri sama'aton ke KHazanon mein kuchh na tha

diwar-o-dar harif-e-mah-o-mehr the magar

dekha to KHwahishon ke makanon mein kuchh na tha

har samt ek dhund si thi rasm-o-rah ki

mera wujud mere zamanon mein kuchh na tha

be-chehra ek KHayal tha be-samt ek safar

aur meri justuju ke Thikanon mein kuchh na tha

me'yar mere apne the apne mere usul

dam warna besh-o-kam ke fasanon mein kuchh na tha

'wasfi' hayat-o-maut ke Takrao ka jawab

mafluj falsafon ki zabanon mein kuchh na tha