jab tak mausam bit na jae

jab tak mausam biit na jaa.e

chehroñ par kyā surḳhī aa.e

dil ab un ke naaz uThā.e

pyaar kiyā hai choT bhī khaa.e

ishq meñ ye lamhāt bhī aa.e

simTī dhuup na phaile saa.e

luuT jahāñ tak luuTā jaa.e

shāyad phir ye daur na aa.e

aag bhī barse abr bhī chhā.e

mausam kyā jo tanhā aa.e

un ko dar dar DhūñDne vaalā

ho saktā hai ḳhud kho jaa.e

dil par ab kyā qahr nahīñ hai

kis kī aañkh meñ aañsū aa.e

apnī chhāñv meñ chalne vaalā

pahle har dīvār girā.e

saaya to hai dhuup kā TukḌā

chhāñv kahāñ jo Thahrā jaa.e

ab tak manzil ek tasavvur

aage jo kuchh vaqt batā.e

'anjum' koī to apnā hogā

sochā lekin soch na paa.e

jab tak mausam bit na jae

chehron par kya surKHi aae

dil ab un ke naz uThae

pyar kiya hai choT bhi khae

ishq mein ye lamhat bhi aae

simTi dhup na phaile sae

luT jahan tak luTa jae

shayad phir ye daur na aae

aag bhi barse abr bhi chhae

mausam kya jo tanha aae

un ko dar dar DhunDne wala

ho sakta hai KHud kho jae

dil par ab kya qahr nahin hai

kis ki aankh mein aansu aae

apni chhanw mein chalne wala

pahle har diwar girae

saya to hai dhup ka TukDa

chhanw kahan jo Thahra jae

ab tak manzil ek tasawwur

aage jo kuchh waqt batae

'anjum' koi to apna hoga

socha lekin soch na pae