jab tak mizaj-e-dost mein kuchh barhami rahi

jab tak mizāj-e-dost meñ kuchh barhamī rahī

goyā bujhī bujhī sī mirī zindagī rahī

jis par nigāh-e-lutf-e-karam aap kī rahī

hairat se har nigāh use dekhtī rahī

go maiñ rahā kashākash-e-daurāñ se ham-kanār

lekin mire laboñ pe hañsī kheltī rahī

laayā hai ishq ne mujhe aise maqām par

ḳhud-āgahī rahī na ḳhudā-āgahī rahī

josh-e-junūñ ne manzil-e-maqsūd pā liyā

aql-e-salīm dekhtī hī dekhtī rahī

sab kuchh mujhe 'ḳhayāl' kī duniyā meñ mil gayā

lekin tumhāre husn-e-nazar kī kamī rahī

jab tak mizaj-e-dost mein kuchh barhami rahi

goya bujhi bujhi si meri zindagi rahi

jis par nigah-e-lutf-e-karam aap ki rahi

hairat se har nigah use dekhti rahi

go main raha kashakash-e-dauran se ham-kanar

lekin mere labon pe hansi khelti rahi

laya hai ishq ne mujhe aise maqam par

KHud-agahi rahi na KHuda-agahi rahi

josh-e-junun ne manzil-e-maqsud pa liya

aql-e-salim dekhti hi dekhti rahi

sab kuchh mujhe 'KHayal' ki duniya mein mil gaya

lekin tumhaare husn-e-nazar ki kami rahi