jab talak ishq ka afsana mukammal hoga

jab talak ishq kā afsāna mukammal hogā

ek tūfān bapā zehn meñ har pal hogā

dil dhaḌakne kī sadā itnī kahāñ hotī hai

paas hī shor machātā koī pāgal hogā

itnā āsān nahīñ dasht-e-tamannā kā safar

kahīñ dariyā to koī rāsta daldal hogā

tishnagī dasht kī sūrat hai laboñ par baiThī

kab tirā haath mire vāste chhāgal hogā

manzil-e-dard se bhī hogā guzarnā tujh ko

tab kahīñ jā ke tirā aa.ina saiqal hogā

āḳhirī sang-e-masāfat hai kahāñ kyā mālūm

kyā ḳhabar kab ye safar apnā mukammal hogā

dil ye kahtā hai chalo dekh hī aa.eñ chal kar

aql kahtī hai ki darvāza muqaffal hogā

us taraf khul ke barastā hai bahut abr-e-ḳhayāl

chand lamhoñ meñ ilāqa mirā jal-thal hogā

chāhte hī nahīñ iblīs siyāsat ke 'mujīb'

mas.ala kaise ta.assub kā yahāñ hal hogā

jab talak ishq ka afsana mukammal hoga

ek tufan bapa zehn mein har pal hoga

dil dhaDakne ki sada itni kahan hoti hai

pas hi shor machata koi pagal hoga

itna aasan nahin dasht-e-tamanna ka safar

kahin dariya to koi rasta daldal hoga

tishnagi dasht ki surat hai labon par baiThi

kab tera hath mere waste chhagal hoga

manzil-e-dard se bhi hoga guzarna tujh ko

tab kahin ja ke tera aaina saiqal hoga

aaKHiri sang-e-masafat hai kahan kya malum

kya KHabar kab ye safar apna mukammal hoga

dil ye kahta hai chalo dekh hi aaen chal kar

aql kahti hai ki darwaza muqaffal hoga

us taraf khul ke barasta hai bahut abr-e-KHayal

chand lamhon mein ilaqa mera jal-thal hoga

chahte hi nahin iblis siyasat ke 'mujib'

masala kaise tassub ka yahan hal hoga