jab talak wo sath tha ek gungunati dhup thi

jab talak vo saath thā ik gungunātī dhuup thī

har taraf hī sardiyoñ kī muskurātī dhuup thī

ḳhvāb meñ aayā thā koī raushnī pahne hue

aur chehre par sunahrī jhilmilātī dhuup thī

khil uThe the zaḳhm saare surḳh phūloñ kī tarah

vo tumhārī yaad thī yā mo’jazātī dhuup thī

chal diyā thā maiñ akelā ḳhud se milne ke liye

duur tak banjar zamīñ thī chilchilātī dhuup thī

shaam kī parchhā.iyoñ meñ raaz ye mujh par khulā

is zamīñ par har taraf saa.e banātī dhuup thī

āsmāñ se jaise utreñ titliyoñ ke qāfile

bādaloñ kī oT se yuuñ chhan ke aatī dhuup thī

ab to 'āsif' kohr ne Dere jamā.e haiñ magar

har taraf us kī hañsī kī chahchahātī dhuup thī

jab talak wo sath tha ek gungunati dhup thi

har taraf hi sardiyon ki muskuraati dhup thi

KHwab mein aaya tha koi raushni pahne hue

aur chehre par sunahri jhilmilati dhup thi

khil uThe the zaKHm sare surKH phulon ki tarah

wo tumhaari yaad thi ya mo’jazati dhup thi

chal diya tha main akela KHud se milne ke liye

dur tak banjar zamin thi chilchilati dhup thi

sham ki parchhaiyon mein raaz ye mujh par khula

is zamin par har taraf sae banati dhup thi

aasman se jaise utren titliyon ke qafile

baadalon ki oT se yun chhan ke aati dhup thi

ab to 'asif' kohr ne Dere jamae hain magar

har taraf us ki hansi ki chahchahati dhup thi