jab tere siwa koi mere kaam na aae

jab tere sivā koī mire kaam na aa.e

kyoñ lab pe mohabbat se tirā naam na aa.e

khilte hī raheñ donoñ gulāboñ kī tarah se

āġhāz mahaktā rahe anjām na aa.e

paḌtī hī raheñ ziist pe ḳhurshīd kī kirneñ

ab sub.h ke aalam pe ruḳh-e-shām na aa.e

hotā hī rahe kaif-e-mohabbat meñ izāfa

nazdīk kabhī gardish-e-ayyām na aa.e

Daale hai musībat meñ na rakkhe hai kahīñ kā

allāh kisī par dil-e-nākām na aa.e

rāhoñ meñ nazar aate haiñ ab husn ke jalve

us shoḳh se kah do ki lab-e-bām na aa.e

jitne bhī ho ilzām sab aa jaa.eñ mire sar

par tujh pe kisī baat kā ilzām na aa.e

ye kis meñ hai himmat ki mire jaan nikāle

jab tak ki mujhe maut kā paiġhām na aa.e

piitā rahūñ bad-mast nigāhoñ se mai-e-shauq

phir ġham nahīñ hāthoñ meñ mire jaam na aa.e

ai 'yās' bas ab vo hī madad-gār hai apnā

koī bhī yahāñ is ke sivā kaam na aa.e

jab tere siwa koi mere kaam na aae

kyon lab pe mohabbat se tera nam na aae

khilte hi rahen donon gulabon ki tarah se

aaghaz mahakta rahe anjam na aae

paDti hi rahen zist pe KHurshid ki kirnen

ab subh ke aalam pe ruKH-e-sham na aae

hota hi rahe kaif-e-mohabbat mein izafa

nazdik kabhi gardish-e-ayyam na aae

Dale hai musibat mein na rakkhe hai kahin ka

allah kisi par dil-e-nakaam na aae

rahon mein nazar aate hain ab husn ke jalwe

us shoKH se kah do ki lab-e-baam na aae

jitne bhi ho ilzam sab aa jaen mere sar

par tujh pe kisi baat ka ilzam na aae

ye kis mein hai himmat ki mere jaan nikale

jab tak ki mujhe maut ka paigham na aae

pita rahun bad-mast nigahon se mai-e-shauq

phir gham nahin hathon mein mere jam na aae

ai 'yas' bas ab wo hi madad-gar hai apna

koi bhi yahan is ke siwa kaam na aae