jab us ka zikr meri guftugu mein rahta hai

jab us kā zikr mirī guftugū meñ rahtā hai

koī charāġh sā raushan lahū meñ rahtā hai

ye aur kis kī sadā gūñjtī hai sahrā meñ

mire sivā koī bhī dasht-e-hū meñ rahtā hai

mire harīf se merā mukālima hai vahī

jo roz-e-jang kamān-o-gulū meñ rahtā hai

ye raushnī jo idhar hai to merī saf kā zarūr

koī sitāra sipāh-e-'adū meñ rahtā hai

vo jis kī aañkh meñ vahshat kā rang raushan hai

vahī ġhazāl mirī justujū meñ rahtā hai

badan meñ jaise koī phuul khilne lagtā hai

'ajīb tajraba kār-e-numū meñ rahtā hai

maiñ saare zaḳhm zamāne ke siitā rahtā huuñ

ravāñ ye haath hamesha rafū meñ rahtā hai

nihāñ haiñ jis kī har ik mauj meñ nahang 'anīs'

mirā safīna usī aabjū meñ rahtā hai

jab us ka zikr meri guftugu mein rahta hai

koi charagh sa raushan lahu mein rahta hai

ye aur kis ki sada gunjti hai sahra mein

mere siwa koi bhi dasht-e-hu mein rahta hai

mere harif se mera mukalima hai wahi

jo roz-e-jang kaman-o-gulu mein rahta hai

ye raushni jo idhar hai to meri saf ka zarur

koi sitara sipah-e-'adu mein rahta hai

wo jis ki aankh mein wahshat ka rang raushan hai

wahi ghazal meri justuju mein rahta hai

badan mein jaise koi phul khilne lagta hai

'ajib tajraba kar-e-numu mein rahta hai

main sare zaKHm zamane ke sita rahta hun

rawan ye hath hamesha rafu mein rahta hai

nihan hain jis ki har ek mauj mein nahang 'anis'

mera safina usi aabju mein rahta hai