jab usko soch ke dekha to ye kamal hua

jab us ko soch ke dekhā to ye kamāl huā

mirī luġhat kā har ik lafz be-misāl huā

vo shahr-e-ḳhvāb se guzrā to daf.atan mujh ko

haqīqatoñ ke badalne kā ehtimāl huā

numūd-e-zāt ko pahle hī raushnī kam thī

baḌhe jo saa.e to kuchh aur bhī malāl huā

thamā na girne sambhalne kā silsila yuuñ hī

maiñ apnī ḳhaak se uTThā to lā-zavāl huā

ye mo.ajiza hī bahut hai ki paikar-e-fan ke

jo koī rabt meñ aayā vo ham-ḳhayāl huā

ham apnī sāda-mizājī meñ sab se pūchhte haiñ

hamāre jaisā bhī āḳhir kisī kā haal huā

hamīñ the us ke javāboñ ke muntazir 'rāhat'

so baar baar hamīñ se koī savāl huā

jab us ko soch ke dekha to ye kamal hua

meri lughat ka har ek lafz be-misal hua

wo shahr-e-KHwab se guzra to dafatan mujh ko

haqiqaton ke badalne ka ehtimal hua

numud-e-zat ko pahle hi raushni kam thi

baDhe jo sae to kuchh aur bhi malal hua

thama na girne sambhalne ka silsila yun hi

main apni KHak se uTTha to la-zawal hua

ye moajiza hi bahut hai ki paikar-e-fan ke

jo koi rabt mein aaya wo ham-KHayal hua

hum apni sada-mizaji mein sab se puchhte hain

hamare jaisa bhi aaKHir kisi ka haal hua

hamin the us ke jawabon ke muntazir 'rahat'

so bar bar hamin se koi sawal hua