jab use gardish-e-ayyam ne mara hoga

jab use gardish-e-ayyām ne maarā hogā

ai musībat meñ kise us ne pukārā hogā

azm-o-himmat hī se qismat ko sañvārā jaa.e

ek maulā hai to kis kis kā sahārā hogā

sū-e-kashtī jo ye tūfān baḌhā aatā hai

azm-o-himmat ke liye us meñ kinārā hogā

phuul to phuul haiñ kāñToñ se lipaT jaatā huuñ

ye samajh kar ki mujhe terā nazāra hogā

ab na sāhil kī talab hai na kināroñ kī talāsh

Duub jā.eñge jahāñ vo hī kinārā hogā

maiñ bhalā terā pata dair-o-haram se pūchhūñ

jazba-e-ishq ko ye kaise gavārā hogā

tum to pazhmurda ġham-e-ḳhār meñ ho ai 'lāġhar'

phuul murjhā.e to kyā haal tumhārā hogā

jab use gardish-e-ayyam ne mara hoga

ai musibat mein kise us ne pukara hoga

azm-o-himmat hi se qismat ko sanwara jae

ek maula hai to kis kis ka sahaara hoga

su-e-kashti jo ye tufan baDha aata hai

azm-o-himmat ke liye us mein kinara hoga

phul to phul hain kanTon se lipaT jata hun

ye samajh kar ki mujhe tera nazara hoga

ab na sahil ki talab hai na kinaron ki talash

Dub jaenge jahan wo hi kinara hoga

main bhala tera pata dair-o-haram se puchhun

jazba-e-ishq ko ye kaise gawara hoga

tum to pazhmurda gham-e-KHar mein ho ai 'laghar'

phul murjhae to kya haal tumhaara hoga