jab wo khiDki se jhankta hoga

jab vo khiḌkī se jhāñktā hogā

chāñd bādal meñ chhup gayā hogā

phuul āñgan meñ khil uThe hoñge

mor shāḳhoñ pe boltā hogā

dekh ke zulf-e-‘ambarī us kī

abr kaisā baras paḌā hogā

us kī rangat ne saare kamre ko

nuur hī nuur kar diyā hogā

ḳhushbueñ aap bichh ga.ī hoñgī

us kā bistar lagā diyā hogā

niiñd āñkhoñ pe chhā ga.ī hogī

aur badan saarā TūTtā hogā

istirāhat kī sarhadoñ se pare

ab vo ġhaflat meñ so rahā hogā

rāt-rānī mahak uThī hogī

jab vo karvaT badal rahā hogā

chheḌtī hogī ab nasīm-e-sahar

ab vo ḳhvāboñ se jāgtā hogā

apnā chehra nihārne ke liye

vo muqābil ba-ā.ina hogā

dekh kar husn-e-be-bahā apnā

ḳhud hī sharmātā jheñptā hogā

jhaḌte hoñge gulāb hoñToñ se

jab kisī se vo boltā hogā

phuul rāhoñ meñ bichh ga.e hoñge

ab vo ghar se nikal rahā hogā

aur ḳhirāmāñ ḳhirāmāñ rakh ke qadam

mere ghar kī taraf baḌhā hogā

dil achānak dhaḌak uThā hai mirā

ab vo nukkaḌ tak aa gayā hogā

aur nukkaḌ pe mere ghar kā pata

mere dushman se pūchhtā hogā

koī jaa.e ki us ko le aa.e

vo pareshān ho rahā hogā

us kī pahchān maiñ batātā huuñ

husn hī husn sar-tā-pā hogā

vo hai jān-e-bahār jān-e-'nūr'

naam to aap ne sunā hogā

jab wo khiDki se jhankta hoga

chand baadal mein chhup gaya hoga

phul aangan mein khil uThe honge

mor shaKHon pe bolta hoga

dekh ke zulf-e-‘ambari us ki

abr kaisa baras paDa hoga

us ki rangat ne sare kamre ko

nur hi nur kar diya hoga

KHushbuen aap bichh gai hongi

us ka bistar laga diya hoga

nind aankhon pe chha gai hogi

aur badan sara TuTta hoga

istirahat ki sarhadon se pare

ab wo ghaflat mein so raha hoga

raat-rani mahak uThi hogi

jab wo karwaT badal raha hoga

chheDti hogi ab nasim-e-sahar

ab wo KHwabon se jagta hoga

apna chehra nihaarne ke liye

wo muqabil ba-aina hoga

dekh kar husn-e-be-baha apna

KHud hi sharmata jhenpta hoga

jhaDte honge gulab honTon se

jab kisi se wo bolta hoga

phul rahon mein bichh gae honge

ab wo ghar se nikal raha hoga

aur KHiraman KHiraman rakh ke qadam

mere ghar ki taraf baDha hoga

dil achanak dhaDak uTha hai mera

ab wo nukkaD tak aa gaya hoga

aur nukkaD pe mere ghar ka pata

mere dushman se puchhta hoga

koi jae ki us ko le aae

wo pareshan ho raha hoga

us ki pahchan main batata hun

husn hi husn sar-ta-pa hoga

wo hai jaan-e-bahaar jaan-e-'nur'

nam to aap ne suna hoga