jab wo likhta hai mujhko jaan-e-ghazal

jab vo likhtā hai mujh ko jān-e-ġhazal

shor uThtā hai darmiyān-e-ġhazal

jhuum uThte haiñ 'āshiqān-e-ġhazal

chheḌ duuñ maiñ jo dāstān-e-ġhazal

mere rab kā huā karam mujh par

mujh pe kholā gayā jahān-e-ġhazal

mujh ko ahl-e-zabān kahte haiñ

jāntī ḳhuub ho zabān-e-ġhazal

ek muddat se muntazir huuñ maiñ

hajla-e-jāñ meñ ho azān-e-ġhazal

aane vaale bhī faiz leñ jis se

chhoḌ jā.ūñgī vo nishān-e-ġhazal

mere misre shabīh haiñ merī

dard merā hai tarjumān-e-ġhazal

dasht-e-ilhām se guzartā hai

nisf-shab dekho kārvān-e-ġhazal

ham pe utre suḳhan ke fan-pāre

ham hī Thahre haiñ pāsbān-e-ġhazal

she'r-goī shi'ār hai apnā

paas kar leñge imtihān-e-ġhazal

aaj mahfil meñ duur se 'ambar'

aa.e baiThe haiñ sāhibān-e-ġhazal

jab wo likhta hai mujh ko jaan-e-ghazal

shor uThta hai darmiyan-e-ghazal

jhum uThte hain 'ashiqan-e-ghazal

chheD dun main jo dastan-e-ghazal

mere rab ka hua karam mujh par

mujh pe khola gaya jahan-e-ghazal

mujh ko ahl-e-zaban kahte hain

jaanti KHub ho zaban-e-ghazal

ek muddat se muntazir hun main

hajla-e-jaan mein ho azan-e-ghazal

aane wale bhi faiz len jis se

chhoD jaungi wo nishan-e-ghazal

mere misre shabih hain meri

dard mera hai tarjuman-e-ghazal

dasht-e-ilham se guzarta hai

nisf-shab dekho karwan-e-ghazal

hum pe utre suKHan ke fan-pare

hum hi Thahre hain pasban-e-ghazal

she'r-goi shi'ar hai apna

pas kar lenge imtihan-e-ghazal

aaj mahfil mein dur se 'ambar'

aae baiThe hain sahiban-e-ghazal