jabin-e-naz pe gard-e-safar saja bhi chuke

jabīn-e-nāz pe gard-e-safar sajā bhī chuke

ki tere shahr se ḳhāna-ba-dosh jā bhī chuke

pukārte ho hameñ kis liye sar-e-maqtal

ḳhirāj le bhī chuke zabt aazmā bhī chuke

tire ḳhayāl kī zid hai ki ham-rikāb rahe

ki ham to ḳhema-e-dil ke diye bujhā bhī chuke

jo be-charāġh bhaTakte the terī galiyoñ meñ

guzar ke jaan se apnā surāġh pā bhī chuke

unheñ batāne chale haiñ vo hurmat-e-paimāñ

jo tere hijr se ahd-e-vafā nibhā bhī chuke

vo jin kī āñkhoñ meñ raushan the zindagī ke charāġh

vo log jā bhī chuke naqsh-e-pā miTā bhī chuke

rahe haiñ vahshat-e-zindāñ meñ sar-ba-kaf raqsāñ

hamīñ jo hurmat-e-dār-o-rasan baḌhā bhī chuke

chale haiñ shāh-jī maqtal ko be-ḳhudī oḌhe

jo hashr aanā ho aa.e balā se aa bhī chuke

jabin-e-naz pe gard-e-safar saja bhi chuke

ki tere shahr se KHana-ba-dosh ja bhi chuke

pukarte ho hamein kis liye sar-e-maqtal

KHiraj le bhi chuke zabt aazma bhi chuke

tere KHayal ki zid hai ki ham-rikab rahe

ki hum to KHema-e-dil ke diye bujha bhi chuke

jo be-charagh bhaTakte the teri galiyon mein

guzar ke jaan se apna suragh pa bhi chuke

unhen batane chale hain wo hurmat-e-paiman

jo tere hijr se ahd-e-wafa nibha bhi chuke

wo jin ki aankhon mein raushan the zindagi ke charagh

wo log ja bhi chuke naqsh-e-pa miTa bhi chuke

rahe hain wahshat-e-zindan mein sar-ba-kaf raqsan

hamin jo hurmat-e-dar-o-rasan baDha bhi chuke

chale hain shah-ji maqtal ko be-KHudi oDhe

jo hashr aana ho aae bala se aa bhi chuke