jabin-e-yar pe aai hai barhami ki shikan

jabīn-e-yār pe aa.ī hai barhamī kī shikan

kahāñ bahār kahāñ shauq-o-ārzū kā chaman

ye tere ruup meñ Duubā tirā gudāz badan

sahar kī god meñ jaise humak rahā ho chaman

har ik nigāh uThī mujh pe uñgliyāñ ban kar

magar kisī ko na sūjhe tire ḳhutūt-e-badan

yahī ma.aal hai koshish kā bad-nasībī meñ

tamām hasrat-o-armāñ tamām ranj-o-mehan

na jaane kitne sarāboñ kā pesh-ḳhema hai

hamāre dasht-e-tasavvur meñ ik ġhazāl-e-ḳhutan

kiyā thā jurm-e-tamannā kabhī javānī meñ

to aaj siite haiñ hasrat kā apne haath kafan

bahār-e-zīst hai shāyad vahī fazā ki jahāñ

gul-e-nashāt kī qīmat hai ḳhār-e-ġham kī chubhan

sadā-bahār hai har zaḳhm-e-dil agar 'rāhī'

hañsī kī baat hai aa.ī ga.ī ḳhizāñ kā chalan

jabin-e-yar pe aai hai barhami ki shikan

kahan bahaar kahan shauq-o-arzu ka chaman

ye tere rup mein Duba tera gudaz badan

sahar ki god mein jaise humak raha ho chaman

har ek nigah uThi mujh pe ungliyan ban kar

magar kisi ko na sujhe tere KHutut-e-badan

yahi maal hai koshish ka bad-nasibi mein

tamam hasrat-o-arman tamam ranj-o-mehan

na jaane kitne sarabon ka pesh-KHema hai

hamare dasht-e-tasawwur mein ek ghazal-e-KHutan

kiya tha jurm-e-tamanna kabhi jawani mein

to aaj site hain hasrat ka apne hath kafan

bahaar-e-zist hai shayad wahi faza ki jahan

gul-e-nashat ki qimat hai KHar-e-gham ki chubhan

sada-bahaar hai har zaKHm-e-dil agar 'rahi'

hansi ki baat hai aai gai KHizan ka chalan