jabin par phir pasina aa gaya hai

jabīñ par phir pasīna aa gayā hai

ki gul par ābgīna aa gayā hai

maiñ rātoñ meñ bhī ab zinda rahūñgā

muqaddar meñ shabīna aa gayā hai

ḳhud apnī ārzūeñ ḳhatm kar leñ

ye kis manzil kā ziina aa gayā hai

khudā.ī meñ kal us kī yaad niklī

phir hāthoñ meñ dafīna aa gayā hai

ḳhud apne ko añgūThī gin rahā hai

ki mushkil meñ nagīna aa gayā hai

maiñ har din ik nayā din jī rahā huuñ

mire bas meñ mahīna aa gayā hai

nayā dariyā hai paanī māñgtā hai

ki ḳhushkī par safīna aa gayā hai

maiñ miTTī se jo kuuza ban gayā huuñ

so bikne kā qarīna aa gayā hai

jabin par phir pasina aa gaya hai

ki gul par aabgina aa gaya hai

main raaton mein bhi ab zinda rahunga

muqaddar mein shabina aa gaya hai

KHud apni aarzuen KHatm kar len

ye kis manzil ka zina aa gaya hai

khudai mein kal us ki yaad nikli

phir hathon mein dafina aa gaya hai

KHud apne ko anguThi gin raha hai

ki mushkil mein nagina aa gaya hai

main har din ek naya din ji raha hun

mere bas mein mahina aa gaya hai

naya dariya hai pani mangta hai

ki KHushki par safina aa gaya hai

main miTTi se jo kuza ban gaya hun

so bikne ka qarina aa gaya hai