jabin pe is dar ka paira bhi hai kamar pe is ghar ka bar bhi hai

jabīñ pe is dar kā pairā bhī hai kamar pe is ghar kā baar bhī hai

idhar ke chukte nahīñ taqāze udhar se paiham pukār bhī hai

ujaaḌ ho bhī chukā mirā dil magar abhī dāġhdār bhī hai

yahī ḳhizāñ thī bahār-e-dushman jo yādgār-e-bahār bhī hai

chaḌhā ke pī thī mai-e-javānī ġhazab thā shīrīñ vo shor paanī

usī kā do din surūr bhī thā usī kā ab tak ḳhumār bhī hai

ye rāh-e-dūr-o-darāz mujh ko dikhātī laa.ī yahī tamāshā

qadam qadam ijtimā bhī hai nafas nafas intishār bhī hai

hamāre un ke bas ik mohabbat ḳhudā.ī kyā bandagī kahāñ kī

bahut hī nāzuk hai go ye rishta magar yahī ustuvār bhī hai

vo sozan-e-fikr jis ne ik din ye raḳht-e-tahzīb sī diyā thā

usī kī kāvish se aaj dekho ye pairahan taar taar bhī hai

nahīñ kiyā shukr zindagī kā magar shikāyat bhī kī nahīñ hai

ki jis qadar nāgavār hai ye usī qadar ḳhush-gavār bhī hai

nahīñ faqat bāvlī nigāheñ zuhūr ḳhud hai ḳhirām-e-mastī

sukūn-e-mahmil-nashīñ kā dushman ye nāqa-e-be-mahār bhī hai

nigār-ḳhāne meñ mehr o mah ke bahut bhayānak hai naqsh-e-ādam

balā kā sarkash azal kā bāġhī magar yahī shāhkār bhī hai

jabin pe is dar ka paira bhi hai kamar pe is ghar ka bar bhi hai

idhar ke chukte nahin taqaze udhar se paiham pukar bhi hai

ujaD ho bhi chuka mera dil magar abhi daghdar bhi hai

yahi KHizan thi bahaar-e-dushman jo yaadgar-e-bahaar bhi hai

chaDha ke pi thi mai-e-jawani ghazab tha shirin wo shor pani

usi ka do din surur bhi tha usi ka ab tak KHumar bhi hai

ye rah-e-dur-o-daraaz mujh ko dikhati lai yahi tamasha

qadam qadam ijtima bhi hai nafas nafas intishaar bhi hai

hamare un ke bas ek mohabbat KHudai kya bandagi kahan ki

bahut hi nazuk hai go ye rishta magar yahi ustuwar bhi hai

wo sozan-e-fikr jis ne ek din ye raKHt-e-tahzib si diya tha

usi ki kawish se aaj dekho ye pairahan tar tar bhi hai

nahin kiya shukr zindagi ka magar shikayat bhi ki nahin hai

ki jis qadar nagawar hai ye usi qadar KHush-gawar bhi hai

nahin faqat bawli nigahen zuhur KHud hai KHiram-e-masti

sukun-e-mahmil-nashin ka dushman ye naqa-e-be-mahaar bhi hai

nigar-KHane mein mehr o mah ke bahut bhayanak hai naqsh-e-adam

bala ka sarkash azal ka baghi magar yahi shahkar bhi hai