jabin pe shahr ki likh kar faza udasi ki

jabīñ pe shahr kī likh kar fazā udāsī kī

bahut hai ḳhush koī de kar duā udāsī kī

hayāt pā na sakegī husain sī ḳhvāhish

samā.atoñ meñ hai jab tak sadā udāsī kī

falak ke chāñd sitāroñ meñ raushnī kam hai

mujhe to lagtī hai is meñ ḳhatā udāsī kī

chahaktī shaam meñ ma.asūm qahqahoñ ke biich

sajī hai kyuuñ tire sar par ridā udāsī kī

charāġh shauq se āḳhir vo ho gayā raushan

liye thī qaid meñ jis ko ghaTā udāsī kī

na ho sakā mujhe ma.alūm kar ga.ī kaise

mire vajūd ko larzāñ havā udāsī kī

ġhamoñ kī rut se kabhī dil figār mat honā

ḳhushī luTā ga.ī aksar adā udāsī kī

masarratoñ se kahīñ dil-rubā sitam niklā

lapeTe shaal bahut ḳhushnumā udāsī kī

ajiib haal hai 'ja.afar' badalte mausam kā

kisī ko kar ga.ī shādāñ sazā udāsī kī

jabin pe shahr ki likh kar faza udasi ki

bahut hai KHush koi de kar dua udasi ki

hayat pa na sakegi husain si KHwahish

samaaton mein hai jab tak sada udasi ki

falak ke chand sitaron mein raushni kam hai

mujhe to lagti hai is mein KHata udasi ki

chahakti sham mein masum qahqahon ke bich

saji hai kyun tere sar par rida udasi ki

charagh shauq se aaKHir wo ho gaya raushan

liye thi qaid mein jis ko ghaTa udasi ki

na ho saka mujhe malum kar gai kaise

mere wajud ko larzan hawa udasi ki

ghamon ki rut se kabhi dil figar mat hona

KHushi luTa gai aksar ada udasi ki

masarraton se kahin dil-ruba sitam nikla

lapeTe shaal bahut KHushnuma udasi ki

ajib haal hai 'jafar' badalte mausam ka

kisi ko kar gai shadan saza udasi ki