jafa kar ke wo pachhtaya sitam TuTa ghazab aaya

jafā kar ke vo pachhtāyā sitam TuuTā ġhazab aaya

sitam TuuTā ġhazab aaya sitam TuuTā ġhazab aaya

junūñ bhī hai ilāhī bekasī bhī hai mohabbat meñ

kahīñ maiñ huuñ kahīñ saayā sitam TuuTā ġhazab aaya

qayāmat Dhaa.ī mujh par hashr toḌā us sitamgar ne

adū ko qabr par laayā sitam TuuTā ġhazab aaya

kahā maiñ ne ki tum par TuuT kar aaya hai dil merā

unhoñ ne hañs ke farmāyā sitam TuuTā ġhazab aaya

shab-e-hijrāñ ke naale se falak haiñ TūTne vaale

hilā hai arsh kā paayā sitam TuuTā ġhazab aaya

kiyā muñh jab kaleje kī taraf sūfār ne qātil

dil-e-betāb chillāyā sitam TuuTā ġhazab aaya

namak vo bharte bharte mere zaḳhmoñ meñ hue barham

kahā jab maiñ ne bhar paayā sitam TuuTā ġhazab aaya

nasīhat-gar se kah do chup rahe gar jaan pyārī hai

agar 'rāsiḳh' ko samjhāyā sitam TuuTā ġhazab aaya

jafa kar ke wo pachhtaya sitam TuTa ghazab aaya

sitam TuTa ghazab aaya sitam TuTa ghazab aaya

junun bhi hai ilahi bekasi bhi hai mohabbat mein

kahin main hun kahin saya sitam TuTa ghazab aaya

qayamat Dhai mujh par hashr toDa us sitamgar ne

adu ko qabr par laya sitam TuTa ghazab aaya

kaha main ne ki tum par TuT kar aaya hai dil mera

unhon ne hans ke farmaya sitam TuTa ghazab aaya

shab-e-hijran ke nale se falak hain TuTne wale

hila hai arsh ka paya sitam TuTa ghazab aaya

kiya munh jab kaleje ki taraf sufar ne qatil

dil-e-betab chillaya sitam TuTa ghazab aaya

namak wo bharte bharte mere zaKHmon mein hue barham

kaha jab main ne bhar paya sitam TuTa ghazab aaya

nasihat-gar se kah do chup rahe gar jaan pyari hai

agar 'rasiKH' ko samjhaya sitam TuTa ghazab aaya