jafa ke baad hua hai magar malal to hai

jafā ke ba.ad huā hai magar malāl to hai

ḳhushā-nasīb unheñ phir mirā ḳhayāl to hai

adū kī bazm-e-tarab meñ sharīk kyā hote

mizāj-e-dost meñ ab tak bhī ishti.āl to hai

zabāñ pe harf-o-hikāyāt kyā zarūrī haiñ

garebāñ chaak dikhānā hī arz-e-hāl to hai

kisī kī rāh-e-mohabbat meñ gāmzan honā

hayāt kā yahī zarrīn ik ma.aal to hai

junūn-e-shauq kī takmīl ho na ho phir bhī

kisī ke pesh-e-nazar ishq kā savāl to hai

nazar meñ pyaar ishāroñ meñ dil kī baat kā aks

zabāñ pe zāhirī ik un kī qīl-o-qāl to hai

tasavvurāt meñ koī samā rahā hai 'ḳhizar'

qarār phir na sahī azm-e-nek-fāl to hai

jafa ke baad hua hai magar malal to hai

KHusha-nasib unhen phir mera KHayal to hai

adu ki bazm-e-tarab mein sharik kya hote

mizaj-e-dost mein ab tak bhi ishtial to hai

zaban pe harf-o-hikayat kya zaruri hain

gareban chaak dikhana hi arz-e-haal to hai

kisi ki rah-e-mohabbat mein gamzan hona

hayat ka yahi zarrin ek maal to hai

junun-e-shauq ki takmil ho na ho phir bhi

kisi ke pesh-e-nazar ishq ka sawal to hai

nazar mein pyar ishaaron mein dil ki baat ka aks

zaban pe zahiri ek un ki qil-o-qal to hai

tasawwuraat mein koi sama raha hai 'KHizar'

qarar phir na sahi azm-e-nek-fal to hai