jafa mein nam nikalo na aasman ki tarah

jafā meñ naam nikālo na āsmāñ kī tarah

khuleñgī laakh zabāneñ mirī zabāñ kī tarah

fareb-e-asar ko koī de mirī fuġhāñ kī tarah

tarāshtī hai ye fiqre tirī zabāñ kī tarah

ye kis kī sāya-e-dīvār ne mujhe piisā

ye kaun TuuT paḌā mujh pe āsmāñ kī tarah

zarūr Dhā.eñge aafat kuchh un ke nāvak-e-nāz

chaḌhe haiñ gosha-e-abrū kaḌī kamāñ kī tarah

rah-e-hayāt kaTī is tarah ki uTh uTh kar

maiñ baiTh baiTh gayā gard-e-kārvāñ kī tarah

ba-rañg-e-tā.ir-e-bū maiñ huuñ ġhuncha-o-gul haiñ

mire qafas kī tarah mere āshiyāñ kī tarah

na tere dar se haTe terī Thokareñ khā kar

vahīñ jame rahe ham sañg-e-āstāñ kī tarah

hameñ hai ghar se ta.alluq ab is qadar baaqī

kabhī jo aa.e to do din ko mehmān kī tarah

gayā chaman ko to jhuk kar bahut milīñ shāḳheñ

liyā guloñ ne mujhe mere āshiyāñ kī tarah

balā hai ye koī thoḌā na jaane paikāñ ko

lahu piyegā hamārā ġham-e-nihāñ kī tarah

zarā sī jaan ko lākhoñ tarah ke khaTke haiñ

chaman na laa.e kahīñ rañg āsmāñ kī tarah

maiñ aa.uuñ aap ke ghar kyā mujhe Darāte haiñ

adū ke naqsh-e-qadam chashm-e-qadam chashm-e-pāsbāñ kī tarah

sharīk-e-dard to kyā bā.is-e-aziyyat haiñ

vo log jin se ta.alluq thā jism o jaañ kī tarah

tumheñ bhī degī mazā kuchh mirī musībat-e-ishq

kahīñ kahīñ se suno us ko dāstāñ kī tarah

rahe kabhī na ilāhī mirā qafas ḳhālī

ki mujh ko chain milā us meñ āshiyāñ kī tarah

mujhe shabāb ne maarā balā-e-jāñ ho kar

bahār aa.ī mire baaġh meñ ḳhizāñ kī tarah

qafas meñ luuT liye kaun se maze maiñ ne

dikhā.e aañkh ne sayyād bāġhbāñ kī tarah

kisī ko chain na qātil kī shoḳhiyoñ se milā

mare hue bhī taḌapte haiñ nīm-jāñ kī tarah

tirī uThān taraqqī kare qayāmat kī

tirā shabāb baḌhe umr-e-jāvedāñ kī tarah

jau apne ghar koī aa le to kaun de taklīf

sitāre kaun vo baiThe haiñ mehmāñ kī tarah

'riyāz' maut hai is shart se hameñ manzūr

zamīñ satā.e na marne par āsmāñ kī tarah

jafa mein nam nikalo na aasman ki tarah

khulengi lakh zabanen meri zaban ki tarah

fareb-e-asar ko koi de meri fughan ki tarah

tarashti hai ye fiqre teri zaban ki tarah

ye kis ki saya-e-diwar ne mujhe pisa

ye kaun TuT paDa mujh pe aasman ki tarah

zarur Dhaenge aafat kuchh un ke nawak-e-naz

chaDhe hain gosha-e-abru kaDi kaman ki tarah

rah-e-hayat kaTi is tarah ki uTh uTh kar

main baiTh baiTh gaya gard-e-karwan ki tarah

ba-rang-e-tair-e-bu main hun ghuncha-o-gul hain

mere qafas ki tarah mere aashiyan ki tarah

na tere dar se haTe teri Thokaren kha kar

wahin jame rahe hum sang-e-astan ki tarah

hamein hai ghar se talluq ab is qadar baqi

kabhi jo aae to do din ko mehman ki tarah

gaya chaman ko to jhuk kar bahut milin shaKHen

liya gulon ne mujhe mere aashiyan ki tarah

bala hai ye koi thoDa na jaane paikan ko

lahu piyega hamara gham-e-nihan ki tarah

zara si jaan ko lakhon tarah ke khaTke hain

chaman na lae kahin rang aasman ki tarah

main aaun aap ke ghar kya mujhe Daraate hain

adu ke naqsh-e-qadam chashm-e-qadam chashm-e-pasban ki tarah

sharik-e-dard to kya bais-e-aziyyat hain

wo log jin se talluq tha jism o jaan ki tarah

tumhein bhi degi maza kuchh meri musibat-e-ishq

kahin kahin se suno us ko dastan ki tarah

rahe kabhi na ilahi mera qafas KHali

ki mujh ko chain mila us mein aashiyan ki tarah

mujhe shabab ne mara bala-e-jaan ho kar

bahaar aai mere bagh mein KHizan ki tarah

qafas mein luT liye kaun se maze main ne

dikhae aankh ne sayyaad baghban ki tarah

kisi ko chain na qatil ki shoKHiyon se mila

mare hue bhi taDapte hain nim-jaan ki tarah

teri uThan taraqqi kare qayamat ki

tera shabab baDhe umr-e-jawedan ki tarah

jau apne ghar koi aa le to kaun de taklif

sitare kaun wo baiThe hain mehman ki tarah

'riyaz' maut hai is shart se hamein manzur

zamin satae na marne par aasman ki tarah