jag mein aata hai har bashar tanha

jag meñ aatā hai har bashar tanhā

lauT jaatā hai phir kidhar tanhā

kuchh duā bhī to ho marīz ke naam

kab davā kā huā asar tanhā

muddatoñ ḳhud ko hī tarāshā hai

siip meñ rah ke ik guhar tanhā

umr-bhar sab ke kaam aayā jo

ro paḌā ḳhud ko dekh kar tanhā

sab masarrat meñ saath dete haiñ

ġham uThā.eñge ham magar tanhā

tark ulfat jo us ne kī ham se

thāmte ham rahe jigar tanhā

chhāñv meñ baiTh kar ga.e haiñ sabhī

rah gayā phir se ik shajar tanhā

kahkashāñ bhī hai aur taare bhī

chāñd aatā hai kyuuñ nazar tanhā

yādoñ ke kārvāñ mile ham se

ḳhud ko samjhe the ham jidhar tanhā

chaar pal vasl ke jo biit ga.e

ḳhud ko paayā hai kis qadar tanhā

beach apnoñ ke rah ke bhī 'monā'

zindagī ham ne kī basar tanhā

jag mein aata hai har bashar tanha

lauT jata hai phir kidhar tanha

kuchh dua bhi to ho mariz ke nam

kab dawa ka hua asar tanha

muddaton KHud ko hi tarasha hai

sip mein rah ke ek guhar tanha

umr-bhar sab ke kaam aaya jo

ro paDa KHud ko dekh kar tanha

sab masarrat mein sath dete hain

gham uThaenge hum magar tanha

tark ulfat jo us ne ki hum se

thamte hum rahe jigar tanha

chhanw mein baiTh kar gae hain sabhi

rah gaya phir se ek shajar tanha

kahkashan bhi hai aur tare bhi

chand aata hai kyun nazar tanha

yaadon ke karwan mile hum se

KHud ko samjhe the hum jidhar tanha

chaar pal wasl ke jo bit gae

KHud ko paya hai kis qadar tanha

beach apnon ke rah ke bhi 'mona'

zindagi hum ne ki basar tanha