jahan bhi hum Thahar gae maqam bolne lage

jahāñ bhī ham Thahar ga.e maqām bolne lage

mohabbatoñ kī boliyāñ avaam bolne lage

sar-e-ġhurūr ḳham nahīñ koī kisī se kam nahīñ

sikandaroñ ke sāmne ġhulām bolne lage

sunī jo jaa.e aañkh se vo jism kī zabān hai

hazār lab ḳhamosh hoñ ḳhirām bolne lage

koī bhī shaḳhs-e-be-adab vo din nahīñ hai duur jab

junūñ meñ apne aap ko imaam bolne lage

sajā vo jab dukān par matā.a-e-ām jaan kar

na.e amiir bad-mizāj daam bolne lage

mufakkirāna ik nazar jo Dālūñ kā.enāt par

ḳhat-e-shikasta meñ likhā kalām bolne lage

hayāt-baḳhsh aab ko miyāñ 'shafaq' sharāb kar

chakhe baġhair aap bhī harām bolne lage

jahan bhi hum Thahar gae maqam bolne lage

mohabbaton ki boliyan awam bolne lage

sar-e-ghurur KHam nahin koi kisi se kam nahin

sikandaron ke samne ghulam bolne lage

suni jo jae aankh se wo jism ki zaban hai

hazar lab KHamosh hon KHiram bolne lage

koi bhi shaKHs-e-be-adab wo din nahin hai dur jab

junun mein apne aap ko imam bolne lage

saja wo jab dukan par mataa-e-am jaan kar

nae amir bad-mizaj dam bolne lage

mufakkirana ek nazar jo Dalun kaenat par

KHat-e-shikasta mein likha kalam bolne lage

hayat-baKHsh aab ko miyan 'shafaq' sharab kar

chakhe baghair aap bhi haram bolne lage