jahan chaho mera nam likho, jo chaho tum ilzam likho

jahāñ chāho merā naam likho, jo chāho tum ilzām likho

mujhe ishq ne barsoñ qaid rakhā mujhe, hijr kī gahrī shaam likho

mire josh-e-junūñ kā ye tanhā safar, ai chāragaro tumheñ kyā hai ḳhabar

mire paas hai jo bhī ye dard-e-hunar, use tum mere hī naam likho

mire lab pe abhī vo savāl hai kyūñ? mire dil meñ abhī vo malāl hai kyūñ?

mire chāroñ-jānib jaal hai kyūñ? mire ḳhvāb kā ab anjām likho

ye ishq-e-musalsal sāvan hai, man aag, to jism ik īñdhan hai

bas maut hai kab, ye jīvan hai? use zahar-bharā ik jaam likho

kabhī dasht meñ ḳhaar pe hai chalnā, kabhī aag kā phuul meñ hai Dhalnā

kabhī tanhā dhuup meñ hai chalnā, use ishq kā hī in.aam likho

har ḳhvāhish hai sar-e-nok-e-sināñ, har chāhat hai bas nauha-kunāñ

ma.alūm nahīñ ḳhud meñ huuñ kahāñ, ab chāñd nahīñ sar-e-bām likho

ye hijr jo ik tūlānī hai mire paas jo ek nishānī hai

'shāhīn' ye mirī jo kahānī hai, use ḳhushiyoñ meñ kohrām likho

jahan chaho mera nam likho, jo chaho tum ilzam likho

mujhe ishq ne barson qaid rakha mujhe, hijr ki gahri sham likho

mere josh-e-junun ka ye tanha safar, ai chaaragaro tumhein kya hai KHabar

mere pas hai jo bhi ye dard-e-hunar, use tum mere hi nam likho

mere lab pe abhi wo sawal hai kyun? mere dil mein abhi wo malal hai kyun?

mere chaaron-jaanib jal hai kyun? mere KHwab ka ab anjam likho

ye ishq-e-musalsal sawan hai, man aag, to jism ek indhan hai

bas maut hai kab, ye jiwan hai? use zahar-bhara ek jam likho

kabhi dasht mein KHar pe hai chalna, kabhi aag ka phul mein hai Dhalna

kabhi tanha dhup mein hai chalna, use ishq ka hi inam likho

har KHwahish hai sar-e-nok-e-sinan, har chahat hai bas nauha-kunan

malum nahin KHud mein hun kahan, ab chand nahin sar-e-baam likho

ye hijr jo ek tulani hai mere pas jo ek nishani hai

'shahin' ye meri jo kahani hai, use KHushiyon mein kohram likho