jahan-e-bandagi ki is tarah takmil hoti hai

jahān-e-bandagī kī is tarah takmīl hotī hai

ki dil qur.ān hotā hai zabāñ injīl hotī hai

'urūj-e-zālim-o-maġhrūr kahtī hai jise duniyā

haqīqat meñ vo qudrat kī taraf se Dhiil hotī hai

taqaddus kā imārat se ta'alluq hai to bas itnā

nigāh-e-shāh se darvesh kī tazlīl hotī hai

hazāroñ saal se chehroñ ne sab kuchh kah diyā lekin

bayāñ ik lafz-e-ġham kī aaj bhī tafsīl hotī hai

azal se husn aur ham lāzim-o-malzūm haiñ nāseh

hamārī fitrat-e-rangīñ kahīñ tabdīl hotī hai

jahan-e-bandagi ki is tarah takmil hoti hai

ki dil quran hota hai zaban injil hoti hai

'uruj-e-zalim-o-maghrur kahti hai jise duniya

haqiqat mein wo qudrat ki taraf se Dhil hoti hai

taqaddus ka imarat se ta'alluq hai to bas itna

nigah-e-shah se darwesh ki tazlil hoti hai

hazaron sal se chehron ne sab kuchh kah diya lekin

bayan ek lafz-e-gham ki aaj bhi tafsil hoti hai

azal se husn aur hum lazim-o-malzum hain naseh

hamari fitrat-e-rangin kahin tabdil hoti hai