jahan-e-ishq mein wo ba-waqar ho ke chale

jahān-e-'ishq meñ vo bā-vaqār ho ke chale

jo kū-e-yār meñ sajda-guzār ho ke chale

vo ahl-e-hosh se pahle hī pā ga.e manzil

jo rāhvār-e-junūñ par savār ho ke chale

havā kuchh aisī chalī miT ga.iiñ sabhī qadreñ

nuqūsh-e-māzī ke gard-o-ġhubār ho ke chale

zakāt aap ke hāthoñ se mil ga.ī jin ko

vo be-navā vo gadā shahr-yār ho ke chale

ḳhayāl-o-ḳhvāb bhī dil bhī nafas bhī īmāñ bhī

jo silsila bhī chale nazr-e-yār ho ke chale

vo jin ko naaz thā īmān-o-zohd-o-taqvā par

butoñ kī ek jhalak par nisār ho ke chale

tumhāre husn kī mā'sūmiyat ke kyā kahne

shikār karne ko aa.e shikār ho ke chale

nasīm tere shabistāñ se ho ke aa.ī hai

ye kis liye na sarāpā bahār ho ke chale

bikhar ke uḌ ga.e aurāq-e-zindagī ai 'charḳh'

ajal ke dosh pe ham bhī savār ho ke chale

jahan-e-'ishq mein wo ba-waqar ho ke chale

jo ku-e-yar mein sajda-guzar ho ke chale

wo ahl-e-hosh se pahle hi pa gae manzil

jo rahwar-e-junun par sawar ho ke chale

hawa kuchh aisi chali miT gain sabhi qadren

nuqush-e-mazi ke gard-o-ghubar ho ke chale

zakat aap ke hathon se mil gai jin ko

wo be-nawa wo gada shahr-yar ho ke chale

KHayal-o-KHwab bhi dil bhi nafas bhi iman bhi

jo silsila bhi chale nazr-e-yar ho ke chale

wo jin ko naz tha iman-o-zohd-o-taqwa par

buton ki ek jhalak par nisar ho ke chale

tumhaare husn ki ma'sumiyat ke kya kahne

shikar karne ko aae shikar ho ke chale

nasim tere shabistan se ho ke aai hai

ye kis liye na sarapa bahaar ho ke chale

bikhar ke uD gae auraq-e-zindagi ai 'charKH'

ajal ke dosh pe hum bhi sawar ho ke chale