jahan-e-KHak se kis ko gila nahin hota

jahān-e-ḳhāk se kis ko gila nahīñ hotā

faqīr huuñ so mujhe mas.ala nahīñ hotā

sabhī pe lafz kī girheñ khulā nahīñ kartīñ

suḳhan kā fahm sabhī ko atā nahīñ hotā

ḳhudā tumhāre muqaddar meñ baḳht likh Daale

kulāh-o-taḳht azīzam burā nahīñ hotā

kabhī kabhār vahī kāTnā bhī paḌtā hai

muqaddaroñ meñ jo likkhā huā nahīñ hotā

tamām mausam-e-sāvan guzar ga.e lekin

mire ḳhayāl kā gulshan harā nahīñ hotā

maiñ intizār kī lazzat se lutf letā huuñ

ye farz vo hai jo sab se adā nahīñ hotā

havā-e-tund yaqīnan uḌā ke le jaatī

tumhāre dar kā agar maiñ gadā nahīñ hotā

gunāh-gār-o-siyahkār huuñ magar phir bhī

ḳhudā kī shaan ki mujh se ḳhafā nahīñ hotā

agar vo vaqt pe merī sañbhāl kar letā

to itne TukḌoñ meñ 'jāmī' baTā nahīñ hotā

jahan-e-KHak se kis ko gila nahin hota

faqir hun so mujhe masala nahin hota

sabhi pe lafz ki girhen khula nahin kartin

suKHan ka fahm sabhi ko ata nahin hota

KHuda tumhaare muqaddar mein baKHt likh Dale

kulah-o-taKHt azizam bura nahin hota

kabhi kabhaar wahi kaTna bhi paDta hai

muqaddaron mein jo likkha hua nahin hota

tamam mausam-e-sawan guzar gae lekin

mere KHayal ka gulshan hara nahin hota

main intizar ki lazzat se lutf leta hun

ye farz wo hai jo sab se ada nahin hota

hawa-e-tund yaqinan uDa ke le jati

tumhaare dar ka agar main gada nahin hota

gunah-gar-o-siyahkar hun magar phir bhi

KHuda ki shan ki mujh se KHafa nahin hota

agar wo waqt pe meri sanbhaal kar leta

to itne TukDon mein 'jami' baTa nahin hota