jahan-e-zat ke aafaq mein daricha mila

jahān-e-zāt ke āfāq meñ darīcha milā

qafas khulā to kahīñ ḳhaak meñ darīcha milā

kisī kitāb ke alfāz qaid-ḳhāne haiñ

kahīñ phaTe hue aurāq meñ darīcha milā

ye vahshateñ tirā dīvāna sah nahīñ paayā

junūñ ko dāman-e-sad-chāk meñ darīcha milā

hamāre kamra-e-jāñ meñ añdhere raushan the

to ham ko jumla-e-laulāk meñ darīcha milā

laTak rahā hai jo manzar frame ke andar

mujhe vahīñ ḳhas-o-ḳhāshāk meñ darīcha milā

kisī ne kamra-e-ḳhāmoshī meñ amaañ paa.ī

kisī ko gufta-e-bebāk meñ darīcha milā

na.e makān ko ābād karne kī ḳhātir

zamīñ pe dar mile aflāk meñ darīcha milā

dar-e-jahān-e-digar band hai har ek pe par

har ek dīda-e-namnāk meñ darīcha milā

laboñ ko kar ke muqaffal jo etakāf kiyā

ba-der hujra-e-idrāk meñ darīcha milā

jahan-e-zat ke aafaq mein daricha mila

qafas khula to kahin KHak mein daricha mila

kisi kitab ke alfaz qaid-KHane hain

kahin phaTe hue auraq mein daricha mila

ye wahshaten tera diwana sah nahin paya

junun ko daman-e-sad-chaak mein daricha mila

hamare kamra-e-jaan mein andhere raushan the

to hum ko jumla-e-laulak mein daricha mila

laTak raha hai jo manzar frame ke andar

mujhe wahin KHas-o-KHashak mein daricha mila

kisi ne kamra-e-KHamoshi mein aman pai

kisi ko gufta-e-bebak mein daricha mila

nae makan ko aabaad karne ki KHatir

zamin pe dar mile aflak mein daricha mila

dar-e-jahan-e-digar band hai har ek pe par

har ek dida-e-namnak mein daricha mila

labon ko kar ke muqaffal jo etakaf kiya

ba-der hujra-e-idrak mein daricha mila