jahan gham hai na ab koi KHushi hai

jahāñ ġham hai na ab koī ḳhushī hai

mohabbat us jagah par aa ga.ī hai

jise dekho use apnī paḌī hai

zamāne kī bahut hālat girī hai

musalsal fikr-e-duniyā fikr-e-uqbā

ab aisī zindagī kyā zindagī hai

maiñ apne dil kī bāteñ kah rahā huuñ

zamāne ke liye ye shā.irī hai

sakūñ miltā hai un kī yaad kar ke

ilāj-e-tishnagī ḳhud tishnagī hai

diloñ meñ hai añdherā ahd-e-nau kā

ba-zāhir raushnī hī raushnī hai

baḌī mushkil hai mīr-e-kārvāñ kī

bahut phailī huī be-rah-ravī hai

na.ī tahzīb meñ sab kuchh hai lekin

faqat insāniyat hī kī kamī hai

ye lagtā hai taraqqī kar rahe haiñ

girāvaT roz baḌhtī jā rahī hai

kahīñ patthar na phīke ye zamāna

terī fikr-o-amal shīshagarī hai

uThā hai ek kone meñ dhuāñ sā

kahīñ shāyad koī bijlī girī hai

karūñ ai 'mauj' kyā ummīd-e-sāhil

ki ab tūfāñ meñ kashtī ghirī hai

jahan gham hai na ab koi KHushi hai

mohabbat us jagah par aa gai hai

jise dekho use apni paDi hai

zamane ki bahut haalat giri hai

musalsal fikr-e-duniya fikr-e-uqba

ab aisi zindagi kya zindagi hai

main apne dil ki baaten kah raha hun

zamane ke liye ye shairi hai

sakun milta hai un ki yaad kar ke

ilaj-e-tishnagi KHud tishnagi hai

dilon mein hai andhera ahd-e-nau ka

ba-zahir raushni hi raushni hai

baDi mushkil hai mir-e-karwan ki

bahut phaili hui be-rah-rawi hai

nai tahzib mein sab kuchh hai lekin

faqat insaniyat hi ki kami hai

ye lagta hai taraqqi kar rahe hain

girawaT roz baDhti ja rahi hai

kahin patthar na phike ye zamana

teri fikr-o-amal shishagari hai

uTha hai ek kone mein dhuan sa

kahin shayad koi bijli giri hai

karun ai 'mauj' kya ummid-e-sahil

ki ab tufan mein kashti ghiri hai