jahan hai qad us ka jalwa-farma to sarw wan kis hisab mein hai

jahāñ hai qad us kā jalva-farmā to sarv vaañ kis hisāb meñ hai

vo qāmat aisā hai kuchh qayāmat qayāmat us kī rikāb meñ hai

ye sab ġhalat hai jo yuuñ haiñ kahte ki us kā mukhḌā naqāb meñ hai

naqāb kyā hai vo sharmgīñ to naqāb se bhī hijāb meñ hai

vo gorā pinDā aur us meñ surḳhī magar ḳhudā ne le sar se tā-pā

kiyā hai maidā to motiyoñ kā aur us ko gūñdhā shahāb meñ hai

jhapak jo mukhḌe kī dekhī us ke to ham ne apne ye dil meñ jaanā

unhī ke partav se mah hai raushan usī kā nuur āftāb meñ hai

rahegā mahbūb jis makāñ meñ to vaañ hī dekheñge us ko jā kar

ġharaz vo jis kā ki naam dil hai ye dhun us ālī-janāb meñ hai

jo ġhussa ho kar vo deve gaalī to us adā se ki ham to kyā haiñ

farishte ġhash ho ke lauT jāveñ ye lutf us ke itaab meñ hai

bañdhā hai jab se ḳhayāl us kā ajab tarah kī lagan lagī hai

kabhī vo dil meñ kabhī vo jī meñ kabhī vo chashm-e-pur-āb meñ hai

vahī udhar hai vahī idhar hai vahī zabāñ par vahī nazar meñ

jo jāgtā huuñ to dhyān meñ hai jo so gayā huuñ to ḳhvāb meñ hai

'nazīr' sīkhe se ilm rasmī bashar kī hotī haiñ chaar āñkheñ

paḌhe se jis ke hoñ laakh āñkheñ vo ilm dil kī kitāb meñ hai

jahan hai qad us ka jalwa-farma to sarw wan kis hisab mein hai

wo qamat aisa hai kuchh qayamat qayamat us ki rikab mein hai

ye sab ghalat hai jo yun hain kahte ki us ka mukhDa naqab mein hai

naqab kya hai wo sharmgin to naqab se bhi hijab mein hai

wo gora pinDa aur us mein surKHi magar KHuda ne le sar se ta-pa

kiya hai maida to motiyon ka aur us ko gundha shahab mein hai

jhapak jo mukhDe ki dekhi us ke to hum ne apne ye dil mein jaana

unhi ke partaw se mah hai raushan usi ka nur aaftab mein hai

rahega mahbub jis makan mein to wan hi dekhenge us ko ja kar

gharaz wo jis ka ki nam dil hai ye dhun us aali-janab mein hai

jo ghussa ho kar wo dewe gali to us ada se ki hum to kya hain

farishte ghash ho ke lauT jawen ye lutf us ke itab mein hai

bandha hai jab se KHayal us ka ajab tarah ki lagan lagi hai

kabhi wo dil mein kabhi wo ji mein kabhi wo chashm-e-pur-ab mein hai

wahi udhar hai wahi idhar hai wahi zaban par wahi nazar mein

jo jagta hun to dhyan mein hai jo so gaya hun to KHwab mein hai

'nazir' sikhe se ilm rasmi bashar ki hoti hain chaar aankhen

paDhe se jis ke hon lakh aankhen wo ilm dil ki kitab mein hai