jahan jahan hai sahar ka aalam wahin wahin raushni nahin hai

jahāñ jahāñ hai sahar kā aalam vahīñ vahīñ raushnī nahīñ hai

hazār sham.eñ huiiñ haiñ raushan magar kahīñ raushnī nahīñ hai

na mujh ko bahkāo in ujāloñ kī mehr-afroz rañgtoñ se

fareb hai ye kisī kiran kā nahīñ nahīñ raushnī nahīñ hai

hamārā zauq-e-nigāh ab tak hai gumrahī kī naqāb oḌhe

ajab tamāshā hai tere jalvoñ meñ mah-jabīñ raushnī nahīñ hai

jahāñ pe sūraj chamak rahā hai vahīñ pe zulmat baras rahī hai

maiñ kyuuñ na zulmat se pyaar kar luuñ ki dil-nashīñ raushnī nahīñ hai

na.e ujāle udaas rūheñ na.e savere bujhe hue haiñ

ye ek dhokā hai raushnī kā dil-e-hazīñ raushnī nahīñ hai

charāġh-e-ḳhufta charāġh-e-raushan se jagmagātā rahā hamesha

maqām-e-hastī ke in añdheroñ pe ḳhashmagīñ raushnī nahīñ hai

baḌhe haiñ manzil kī samt ham bhī shuā-e-'baḳht'-e-jamīl le kar

hameñ taraddud nahīñ hai koī agar kahīñ raushnī nahīñ hai

jahan jahan hai sahar ka aalam wahin wahin raushni nahin hai

hazar shamen huin hain raushan magar kahin raushni nahin hai

na mujh ko bahkao in ujalon ki mehr-afroz rangton se

fareb hai ye kisi kiran ka nahin nahin raushni nahin hai

hamara zauq-e-nigah ab tak hai gumrahi ki naqab oDhe

ajab tamasha hai tere jalwon mein mah-jabin raushni nahin hai

jahan pe suraj chamak raha hai wahin pe zulmat baras rahi hai

main kyun na zulmat se pyar kar lun ki dil-nashin raushni nahin hai

nae ujale udas ruhen nae sawere bujhe hue hain

ye ek dhoka hai raushni ka dil-e-hazin raushni nahin hai

charagh-e-KHufta charagh-e-raushan se jagmagata raha hamesha

maqam-e-hasti ke in andheron pe KHashmagin raushni nahin hai

baDhe hain manzil ki samt hum bhi shua-e-'baKHt'-e-jamil le kar

hamein taraddud nahin hai koi agar kahin raushni nahin hai