jahan ke ruKH pe agar khiDkiyan banate hum

jahāñ ke ruḳh pe agar khiḌkiyāñ banāte ham

to sirf saañs kī āsāniyāñ banāte ham

pahan pahan ke dikhāne ko Dher lag jaatā

ye shor kaaT ke tanhā.iyāñ banāte ham

koī to ḳhvāb ke us paar bhī pahuñch jaatā

zarā sā jāgte aur kashtiyāñ banāte ham

hamāre shahr meñ hotī na rasm-e-sañg-zanī

to canvas pe harī beriyāñ banāte ham

saḌak banāte hue tum kuchal na jaate hameñ

mohabbatoñ se bharī gāḌiyāñ banāte ham

ye Thos meñ bhī azānoñ se āshnā hotī

agar uThān meñ kuchh jāliyāñ banāte ham

tabhī gul-o-samar-o-sāya kī sanad miltī

zamīñ ko paḌhte hue kyāriyāñ banāte ham

diloñ meñ taaza havā kī chalat-phirat rahtī

ta.assubāt meñ rahdāriyāñ banāte ham

jahān-bhar ko rihā.ish kī aarzū hotī

ba-tarz-e-vasl tirī dūriyāñ banāte ham

ninānve pe jame saañp se nimaT lete

tire liye to faqat sīḌhiyāñ banāte ham

jahan ke ruKH pe agar khiDkiyan banate hum

to sirf sans ki aasaniyan banate hum

pahan pahan ke dikhane ko Dher lag jata

ye shor kaT ke tanhaiyan banate hum

koi to KHwab ke us par bhi pahunch jata

zara sa jagte aur kashtiyan banate hum

hamare shahr mein hoti na rasm-e-sang-zani

to canwas pe hari beriyan banate hum

saDak banate hue tum kuchal na jate hamein

mohabbaton se bhari gaDiyan banate hum

ye Thos mein bhi azanon se aashna hoti

agar uThan mein kuchh jaliyan banate hum

tabhi gul-o-samar-o-saya ki sanad milti

zamin ko paDhte hue kyariyan banate hum

dilon mein taza hawa ki chalat-phirat rahti

tassubaat mein rahdariyan banate hum

jahan-bhar ko rihaish ki aarzu hoti

ba-tarz-e-wasl teri duriyan banate hum

ninanwe pe jame sanp se nimaT lete

tere liye to faqat siDhiyan banate hum