jahan ko banT kar KHushiyan jo muskanon mein rahte the

jahāñ ko baañT kar ḳhushiyāñ jo muskānoñ meñ rahte the

vo mahloñ meñ nahīñ 'tashna' bayābānoñ meñ rahte the

hamāre ghar meñ laayā kaun in masnūī phūloñ ko

yahāñ pahle to aslī phuul gul-dānoñ meñ rahte the

unheñ bhī shauq-e-duniyā ne ġhulām apnā banā Daalā

hamesha ġharq jo tasbīh ke dānoñ meñ rahte the

utar aa.e haiñ saḌkoñ par vo sāġhar toḌ kar apne

ġham-e-daurāñ se be-parvā jo mai-ḳhānoñ meñ rahte the

ḳhatā bas ye hui sachchā.iyoñ se muñh nahīñ moḌā

vagarna ham bhī us ke ḳhaas mehmānoñ meñ rahte the

viriddha-āshram meñ un ke aañsū kaun poñchhegā

hamāre gaañv meñ jo log dālānoñ meñ rahte the

jalāl aatā thā jis dam ham faqīroñ ko to ai 'tashna'

laraz jaate the vo bhī jo ki aivānoñ meñ rahte the

jahan ko banT kar KHushiyan jo muskanon mein rahte the

wo mahlon mein nahin 'tashna' bayabanon mein rahte the

hamare ghar mein laya kaun in masnui phulon ko

yahan pahle to asli phul gul-danon mein rahte the

unhen bhi shauq-e-duniya ne ghulam apna bana Dala

hamesha gharq jo tasbih ke danon mein rahte the

utar aae hain saDkon par wo saghar toD kar apne

gham-e-dauran se be-parwa jo mai-KHanon mein rahte the

KHata bas ye hui sachchaiyon se munh nahin moDa

wagarna hum bhi us ke KHas mehmanon mein rahte the

wiriddha-ashram mein un ke aansu kaun ponchhega

hamare ganw mein jo log dalanon mein rahte the

jalal aata tha jis dam hum faqiron ko to ai 'tashna'

laraz jate the wo bhi jo ki aiwanon mein rahte the