jahan mein Dalte rahte hain ma-siwa ki tarah

jahāñ meñ Dālte rahte haiñ mā-sivā kī tarah

daraḳht chal nahīñ sakte magar havā kī tarah

bhaTak kar aa.ī thī kuchh der ko idhar duniyā

lipaT ga.ī mire dil se kisī balā kī tarah

mire hisār se bāhar bhī vo nahīñ rahtā

mire qarīb bhī aatā nahīñ ḳhudā kī tarah

bahut se rañg utarte haiñ merī āñkhoñ meñ

kisī ke dhyān meñ uljhī huī sadā kī tarah

utar gayā mire dil meñ vo be-dhaḌak lekin

laboñ par aa nahīñ paayā hai mudda.ā kī tarah

ravāñ-davāñ haiñ mire ās-pās kī ashiyā

paḌā huā huuñ zamīñ par maiñ naqsh-e-pā kī tarah

simaT sakūñgā na apne vajūd meñ 'sājid'

pahan liyā hai kisī ne mujhe qabā kī tarah

jahan mein Dalte rahte hain ma-siwa ki tarah

daraKHt chal nahin sakte magar hawa ki tarah

bhaTak kar aai thi kuchh der ko idhar duniya

lipaT gai mere dil se kisi bala ki tarah

mere hisar se bahar bhi wo nahin rahta

mere qarib bhi aata nahin KHuda ki tarah

bahut se rang utarte hain meri aankhon mein

kisi ke dhyan mein uljhi hui sada ki tarah

utar gaya mere dil mein wo be-dhaDak lekin

labon par aa nahin paya hai muddaa ki tarah

rawan-dawan hain mere aas-pas ki ashiya

paDa hua hun zamin par main naqsh-e-pa ki tarah

simaT sakunga na apne wajud mein 'sajid'

pahan liya hai kisi ne mujhe qaba ki tarah