jahan mein DhunD rahe ho masarraten kaisi

jahāñ meñ DhūñD rahe ho masarrateñ kaisī

ye ġham-kada hai miyāñ is meñ rāhateñ kaisī

mire gunāhoñ pe chhā.ī haiñ rahmateñ kaisī

'atā huī haiñ muqaddar ko rif'ateñ kaisī

jahāñ meñ tujh ko hai shikva 'abas añdheroñ kā

agar ho dil meñ ujālā to zulmateñ kaisī

the aur log bhī mahfil meñ mahv-e-nazzāra

faqat hamīñ pe haiñ 'aa.ed ye tohmateñ kaisī

ye kis ne aa.ina dikhlā diyā hai maazī ko

rukī haiñ ek hī markaz pe sā'ateñ kaisī

hai sahmī sahmī guloñ kī shaguftagī 'jagdīsh'

rukī rukī haiñ tabassum kī hasrateñ kaisī

jahan mein DhunD rahe ho masarraten kaisi

ye gham-kada hai miyan is mein rahaten kaisi

mere gunahon pe chhai hain rahmaten kaisi

'ata hui hain muqaddar ko rif'aten kaisi

jahan mein tujh ko hai shikwa 'abas andheron ka

agar ho dil mein ujala to zulmaten kaisi

the aur log bhi mahfil mein mahw-e-nazzara

faqat hamin pe hain 'aed ye tohmaten kaisi

ye kis ne aaina dikhla diya hai mazi ko

ruki hain ek hi markaz pe sa'aten kaisi

hai sahmi sahmi gulon ki shaguftagi 'jagdish'

ruki ruki hain tabassum ki hasraten kaisi