jahan mein hai har ek ik na ek ada ke liye

jahāñ meñ hai har ik ik na ik adā ke liye

koī vafā ke liye hai koī jafā ke liye

hai ek ghūñT bahut shaiḳh-e-pārsā ke liye

gilās bhar ke na do mai-kasho ḳhudā ke liye

hamāre dard ko be-dard dard jaane kyā

ye dard vo hai ki hai dard-āshnā ke liye

kahīñ tumhīñ ko tumhārī nazar na ho jaa.e

na dekho aa.ina ai jān-e-man ḳhudā ke liye

falak ko toḌ ke 'arsh-e-barīñ hilā denā

hai sahl kaam mire nāla-e-rasā ke liye

zahe-nasīb ki apne vafā-shi.āroñ meñ

mujhī ko chun liyā us shoḳh ne jafā ke liye

hadaf banā.egā dil ko mire jigar ko bhī

tirī nigāh kā paikāñ nahīñ ḳhatā ke liye

falak se hotī haiñ nāzil balā.eñ ban ban kar

kabhī jo haath uThātā huuñ maiñ ḳhudā ke liye

jahān meñ koī is se judā nahīñ ai dil

ḳhatā bashar ke liye hai bashar ḳhatā ke liye

agar hai sar tire ḳhanjar ke vāste ai tark

to hai jigar bhī mirā nāvak-e-adā ke liye

milā usī ko maza zindagī kā ai 'sābir'

jo mar-miTā hai kisī shoḳh-e-pārsā ke liye

jahan mein hai har ek ek na ek ada ke liye

koi wafa ke liye hai koi jafa ke liye

hai ek ghunT bahut shaiKH-e-parsa ke liye

gilas bhar ke na do mai-kasho KHuda ke liye

hamare dard ko be-dard dard jaane kya

ye dard wo hai ki hai dard-ashna ke liye

kahin tumhin ko tumhaari nazar na ho jae

na dekho aaina ai jaan-e-man KHuda ke liye

falak ko toD ke 'arsh-e-barin hila dena

hai sahl kaam mere nala-e-rasa ke liye

zahe-nasib ki apne wafa-shiaron mein

mujhi ko chun liya us shoKH ne jafa ke liye

hadaf banaega dil ko mere jigar ko bhi

teri nigah ka paikan nahin KHata ke liye

falak se hoti hain nazil balaen ban ban kar

kabhi jo hath uThata hun main KHuda ke liye

jahan mein koi is se juda nahin ai dil

KHata bashar ke liye hai bashar KHata ke liye

agar hai sar tere KHanjar ke waste ai tark

to hai jigar bhi mera nawak-e-ada ke liye

mila usi ko maza zindagi ka ai 'sabir'

jo mar-miTa hai kisi shoKH-e-parsa ke liye