jahan mein phul nahin koi zindagi jaisa

jahāñ meñ phuul nahīñ koī zindagī jaisā

ajab nahīñ jo farishta ho aadmī jaisā

milā hai miT ke mohabbat meñ ye maqām mujhe

kisī kā ġham hai añdhere meñ raushnī jaisā

har ek phuul hai āsūda-e-bahār magar

kisī ke lab pe tabassum nahīñ kalī jaisā

vo aa ga.e shab-e-va.ada to haal kyā hogā

abhī se ghar meñ ujālā hai chāñdnī jaisā

maiñ apne ghar meñ jalā.ūñ bhī kyoñ charāġh abhī

tirā ḳhayāl to hai dil meñ raushnī jaisā

hue haiñ log to gumnām be-vatan ho kar

maiñ apne shahr meñ lagtā huuñ ajnabī jaisā

jahān-e-ġham kā har ik ġham hai merā ġham 'shādāñ'

maiñ aadmī huuñ to dil bhī hai aadmī jaisā

jahan mein phul nahin koi zindagi jaisa

ajab nahin jo farishta ho aadmi jaisa

mila hai miT ke mohabbat mein ye maqam mujhe

kisi ka gham hai andhere mein raushni jaisa

har ek phul hai aasuda-e-bahaar magar

kisi ke lab pe tabassum nahin kali jaisa

wo aa gae shab-e-wada to haal kya hoga

abhi se ghar mein ujala hai chandni jaisa

main apne ghar mein jalaun bhi kyon charagh abhi

tera KHayal to hai dil mein raushni jaisa

hue hain log to gumnam be-watan ho kar

main apne shahr mein lagta hun ajnabi jaisa

jahan-e-gham ka har ek gham hai mera gham 'shadan'

main aadmi hun to dil bhi hai aadmi jaisa