jahan mein rah ke bhi hum kab jahan mein rahte hain

jahāñ meñ rah ke bhī ham kab jahāñ meñ rahte haiñ

makāñ ko chhoḌ chuke haiñ zamāñ meñ rahte haiñ

tire ḳhayāl meñ apnā guzar nahīñ hotā

jo dil se gir ga.e vahm-o-gumāñ meñ rahte haiñ

chhaTe ġhubār to nām-o-nishāñ hamārā mile

ki ham to gard-e-pas-e-kārvāñ meñ rahte haiñ

jo ḳhaar haiñ vo khaTakte haiñ chashm-e-a.adā meñ

jo phuul haiñ vo dil-e-dostāñ meñ rahte haiñ

shaguft-e-jāñ ke liye khīñch ranj-e-mahrūmī

bahār ke sabhī mausam ḳhizāñ meñ rahte haiñ

nahīñ jo vo to dar-o-bām kī fazā se milo

makīñ ke rang-e-tabī'at makāñ meñ rahte haiñ

ham apnī aag ko paanī meñ Dhālne ke liye

tilism-kārī-e-āh-o-fuġhāñ meñ rahte haiñ

'urūj-e-ishq ye dekhā ki tere dīvāne

zamīñ pe chalte haiñ aur āsmāñ meñ rahte haiñ

kitāb-e-hāl meñ 'bāqar' ko DhūñDte ho 'abas

sunā hai dil kī kisī dāstāñ meñ rahte haiñ

jahan mein rah ke bhi hum kab jahan mein rahte hain

makan ko chhoD chuke hain zaman mein rahte hain

tere KHayal mein apna guzar nahin hota

jo dil se gir gae wahm-o-guman mein rahte hain

chhaTe ghubar to nam-o-nishan hamara mile

ki hum to gard-e-pas-e-karwan mein rahte hain

jo KHar hain wo khaTakte hain chashm-e-ada mein

jo phul hain wo dil-e-dostan mein rahte hain

shaguft-e-jaan ke liye khinch ranj-e-mahrumi

bahaar ke sabhi mausam KHizan mein rahte hain

nahin jo wo to dar-o-baam ki faza se milo

makin ke rang-e-tabi'at makan mein rahte hain

hum apni aag ko pani mein Dhaalne ke liye

tilism-kari-e-ah-o-fughan mein rahte hain

'uruj-e-ishq ye dekha ki tere diwane

zamin pe chalte hain aur aasman mein rahte hain

kitab-e-haal mein 'baqar' ko DhunDte ho 'abas

suna hai dil ki kisi dastan mein rahte hain