jahan pe sab ke zamiron ne KHud-kushi kar li

jahāñ pe sab ke zamīroñ ne ḳhud-kushī kar lī

vahāñ pe merī dalīloñ ne ḳhud-kushī kar lī

tumhāre lahje meñ talḳhī kī taab lā na sake

zabāñ pe aate hī lafzoñ ne ḳhud-kushī kar lī

huā hai zabt pe bhārī jab apne ġham kā bojh

nikal ke aañkh se ashkoñ ne ḳhud-kushī kar lī

ma.āshre meñ vo uryāniyat kā aalam hai

ye lag rahā hai libāsoñ ne ḳhud-kushī kar lī

jo masnadoñ se kisānoñ kā chūste the lahū

batāo un ko kisānoñ ne ḳhud-kushī kar lī

ik āftāb chamakne lagā to ghabrā kar

yahāñ pe kitne charāġhoñ ne ḳhud-kushī kar lī

diyā hai dars mohabbat kā maiñ ne jab 'bismil'

lahū ke pyāse rivājoñ ne ḳhud-kushī kar lī

jahan pe sab ke zamiron ne KHud-kushi kar li

wahan pe meri dalilon ne KHud-kushi kar li

tumhaare lahje mein talKHi ki tab la na sake

zaban pe aate hi lafzon ne KHud-kushi kar li

hua hai zabt pe bhaari jab apne gham ka bojh

nikal ke aankh se ashkon ne KHud-kushi kar li

maashre mein wo uryaniyat ka aalam hai

ye lag raha hai libason ne KHud-kushi kar li

jo masnadon se kisanon ka chuste the lahu

batao un ko kisanon ne KHud-kushi kar li

ek aaftab chamakne laga to ghabra kar

yahan pe kitne charaghon ne KHud-kushi kar li

diya hai dars mohabbat ka main ne jab 'bismil'

lahu ke pyase riwajon ne KHud-kushi kar li