jahan unchi imarat hai wahin miTTi ka bhi ghar hai

jahāñ ūñchī imārat hai vahīñ miTTī kā bhī ghar hai

ye qabristān ko dekho zarā kitnā barābar hai

samundar kī ḳhamoshī bhī to ik din TuuT jaatī hai

magar kaise bhalā TuuTe jo tere in laboñ par hai

bahut taḌpā rahe ho baap ko raste meñ tum lekin

usī raste meñ hai beTā ajab kaisā ye chakkar hai

haqīqat zindagī kī khul ga.ī mujh par ki duniyā meñ

zamīñ par sañg hai hiirā magar miTTī ke andar hai

ye kaisā zaḳhm hai ab tak harā hai kyoñ nahīñ bhartā

yahāñ marham nahīñ hai vaqt ke hāthoñ meñ ḳhanjar hai

bahut parde haiñ is kambaḳht ke kirdār par 'fā.ez'

ki chāñdī kī koī pannī kisī patthar ke uupar hai

jahan unchi imarat hai wahin miTTi ka bhi ghar hai

ye qabristan ko dekho zara kitna barabar hai

samundar ki KHamoshi bhi to ek din TuT jati hai

magar kaise bhala TuTe jo tere in labon par hai

bahut taDpa rahe ho bap ko raste mein tum lekin

usi raste mein hai beTa ajab kaisa ye chakkar hai

haqiqat zindagi ki khul gai mujh par ki duniya mein

zamin par sang hai hira magar miTTi ke andar hai

ye kaisa zaKHm hai ab tak hara hai kyon nahin bharta

yahan marham nahin hai waqt ke hathon mein KHanjar hai

bahut parde hain is kambaKHt ke kirdar par 'faez'

ki chandi ki koi panni kisi patthar ke upar hai