جہاں والوں سے روداد جہاں کچھ اور کہتی ہے

جہاں والوں سے روداد جہاں کچھ اور کہتی ہے

پئے اہل نظر یہ داستاں کچھ اور کہتی ہے

نئے ماحول میں عمر رواں کچھ اور کہتی ہے

بہ انداز دگر یہ داستاں کچھ اور کہتی ہے

کسی کے سامنے پہلے زباں کچھ اور کہتی تھی

بدل کر اب یہ انداز بیاں کچھ اور کہتی ہے

تری چشم سخن گو کا کوئی انداز تو دیکھے

نہاں کچھ اور کہتی ہے عیاں کچھ اور کہتی ہے

خموشی معنی دارد کہ در گفتن نمی آید

خموشی سے عبارت داستاں کچھ اور کہتی ہے

نہ اب کلیاں چٹکتی ہیں نہ غنچے مسکراتے ہیں

گلستاں سے ہوائے گلستاں کچھ اور کہتی ہے

بہ قدر حوصلہ جینے کا ارماں کیا کرے کوئی

زمانہ کی ہوا اے مہرباں کچھ اور کہتی ہے

ہمیں تو مدعا صرف ایک ہی اس میں نظر آیا

کہے سو بار گر تیری زباں کچھ اور کہتی ہے

نہاں ہے عظمت دیرینہ کی اک داستاں اس میں

چمن والوں سے خاک آشیاں کچھ اور کہتی ہے

حقیقت کس میں کتنی ہے کسے اب معتبر سمجھیں

خزاں کچھ اور بہار بے خزاں کچھ اور کہتی ہے

بہار جاوداں گلشن میں اب کچھ بھی کہے طالبؔ

قفس والوں سے یاد آشیاں کچھ اور کہتی ہے