jaise jaise maut ki manzil qarib aane lagi

jaise jaise maut kī manzil qarīb aane lagī

zindagī apne safar par ḳhud hī pachhtāne lagī

sochtā huuñ jism se bāhar nikal jā.ūñ abhī

ab tabī'at ghar meñ baiThe baiThe ghabrāne lagī

vo añdhere ke muqābil der tak Thahregā kyā

jis diye kī lau havā se pahle tharrāne lagī

'ishq aksar aisī manzil par mujhe laayā jahāñ

'aql ko dil aur dil ko 'aql samjhāne lagī

kuchh mohabbat kuchh nazākat kuchh sharārat kuchh hayā

jab bulāyā paas ham ne duur vo jaane lagī

zindagī kā hāfiza 'rāhib' yaqīnan tang hai

bhuul kar kal ke dukhoñ ko aaj muskāne lagī

jaise jaise maut ki manzil qarib aane lagi

zindagi apne safar par KHud hi pachhtane lagi

sochta hun jism se bahar nikal jaun abhi

ab tabi'at ghar mein baiThe baiThe ghabrane lagi

wo andhere ke muqabil der tak Thahrega kya

jis diye ki lau hawa se pahle tharrane lagi

'ishq aksar aisi manzil par mujhe laya jahan

'aql ko dil aur dil ko 'aql samjhane lagi

kuchh mohabbat kuchh nazakat kuchh shararat kuchh haya

jab bulaya pas hum ne dur wo jaane lagi

zindagi ka hafiza 'rahib' yaqinan tang hai

bhul kar kal ke dukhon ko aaj muskane lagi