jaise nae zamane ki raftar gir paDi

jaise na.e zamāne kī raftār gir paḌī

aise purāne vaqt kī dīvār gir paḌī

uTh uTh ke aa to pahuñchī haiñ lahreñ idhar magar

kyā chiiz jaane dariyā ke us paar gir paḌī

is baar kyā girī hai ki kohrām mach gayā

pagḌī to is se pahle ka.ī baar gir paḌī

lafzoñ ko ham ne tol ke rakkhā thā hoñT par

phir kyuuñ bahas meñ baat vazan daar gir paḌī

bāzār meñ to fan ke ḳharīdār ab bhī haiñ

kis ne kahā ki qīmat-e-fankār gir paḌī

din thā thakan se chuur ufuq pe niDhāl saal

sūraj ke saath shaam bhī lāchār gir paḌī

dekhā muḳhālifoñ meñ jo shāmil rafīq ko

'parvez' apne haath se talvār gir paḌī

jaise nae zamane ki raftar gir paDi

aise purane waqt ki diwar gir paDi

uTh uTh ke aa to pahunchi hain lahren idhar magar

kya chiz jaane dariya ke us par gir paDi

is bar kya giri hai ki kohram mach gaya

pagDi to is se pahle kai bar gir paDi

lafzon ko hum ne tol ke rakkha tha honT par

phir kyun bahas mein baat wazan dar gir paDi

bazar mein to fan ke KHaridar ab bhi hain

kis ne kaha ki qimat-e-fankar gir paDi

din tha thakan se chur ufuq pe niDhaal sal

suraj ke sath sham bhi lachaar gir paDi

dekha muKHalifon mein jo shamil rafiq ko

'parwez' apne hath se talwar gir paDi