jaise subh ko suraj nikle sham Dhale chhup jae hai

jaise sub.h ko sūraj nikle shaam Dhale chhup jaa.e hai

tum bhī musāfir maiñ bhī musāfir duniyā ek sarā.e hai

rāz-e-ḳhudī hai ye farzāno behtar hai ye raaz na jaano

jo ḳhud ko pahchāne hai vo dīvāna kahlā.e hai

fahm-o-ḳhirad se josh-e-junūñ tak har manzil se guzre haiñ

ham to dīvāne haiñ bhaa.ī ham ko kyā samjhā.e hai

hijr kī shab yuuñ thapak thapak kar mujh ko sulā.e terī yaad

jaise maañ kī lorī sun kar ik bachcha so jaa.e hai

jab se tum ne āñkheñ pherīñ sab ne hī muñh pher liyā

haa.e shab-e-hijrāñ kyā kahiye shabnam aag lagā.e hai

koī mujh se mujhe milā de mujh ko hai apnī hī talāsh

bastī bastī ye dīvāna kaisā shor machā.e hai

jis ne sab ke ġham bāñTe haiñ ham vo dīvāne haiñ 'shafīq'

ye vo daur hai jis meñ har ik apnī aag bujhā.e hai

jaise subh ko suraj nikle sham Dhale chhup jae hai

tum bhi musafir main bhi musafir duniya ek sarae hai

raaz-e-KHudi hai ye farzano behtar hai ye raaz na jaano

jo KHud ko pahchane hai wo diwana kahlae hai

fahm-o-KHirad se josh-e-junun tak har manzil se guzre hain

hum to diwane hain bhai hum ko kya samjhae hai

hijr ki shab yun thapak thapak kar mujh ko sulae teri yaad

jaise man ki lori sun kar ek bachcha so jae hai

jab se tum ne aankhen pherin sab ne hi munh pher liya

hae shab-e-hijran kya kahiye shabnam aag lagae hai

koi mujh se mujhe mila de mujh ko hai apni hi talash

basti basti ye diwana kaisa shor machae hai

jis ne sab ke gham banTe hain hum wo diwane hain 'shafiq'

ye wo daur hai jis mein har ek apni aag bujhae hai