jal kar un aankhon mein aansu jab kajal ban jate hain

jal kar un āñkhoñ meñ aañsū jab kājal ban jaate haiñ

dil se uTh kar reg bagūle dal bādal ban jaate haiñ

koī sachchī baat zabāñ par jab bhī kabhī aa jaatī hai

vo sahrā ho yā gulshan ho sab maqtal ban jaate haiñ

jab bhī zehn meñ jaag uThtī hai in hoñToñ kī shīrīnī

kaise kaise talḳh masā.il jaan ġhazal ban jaate haiñ

us se ziyāda kyā hogā arbāb-e-mohabbat kā iz.hār

vo bekal ho jaate haiñ to sab bekal ban jaate haiñ

ham ne sadiyoñ kī dīvāroñ meñ jo raḳhne Daale the

un se guzarne vaale lamhe tāj-mahal ban jaate haiñ

jal kar un aankhon mein aansu jab kajal ban jate hain

dil se uTh kar reg bagule dal baadal ban jate hain

koi sachchi baat zaban par jab bhi kabhi aa jati hai

wo sahra ho ya gulshan ho sab maqtal ban jate hain

jab bhi zehn mein jag uThti hai in honTon ki shirini

kaise kaise talKH masail jaan ghazal ban jate hain

us se ziyaada kya hoga arbab-e-mohabbat ka izhaar

wo bekal ho jate hain to sab bekal ban jate hain

hum ne sadiyon ki diwaron mein jo raKHne Dale the

un se guzarne wale lamhe taj-mahal ban jate hain