jal uTha dagh-e-tamanna ka diya sham Dhale

jal uThā dāġh-e-tamannā kā diyā shaam Dhale

aur ehsās-e-alam tez huā shaam Dhale

laa.e paiġhām tirā mauj-e-havā shaam Dhale

aks āñkhoñ meñ utar aa.e tirā shaam Dhale

jāgtī āñkhoñ meñ phir jaate haiñ kyā kyā manzar

jab saraktī hai ḳhayāloñ kī ridā shaam Dhale

dastakeñ detī hai ehsās ke darvāze par

ek anjān sī be-nām sadā shaam Dhale

phir dabe paañv chalī aa.ī kisī kī ḳhushbū

phir mahakne lagī kamre kī fazā shaam Dhale

ho na ye us ke taġhāful kā kahīñ radd-e-amal

jāgne lagtī hai kyoñ merī anā shaam Dhale

narm maḳhmal ke bichhaune bhī na de paa.e 'nasīm'

god meñ maañ kī jo aatā thā maza shaam Dhale

jal uTha dagh-e-tamanna ka diya sham Dhale

aur ehsas-e-alam tez hua sham Dhale

lae paigham tera mauj-e-hawa sham Dhale

aks aankhon mein utar aae tera sham Dhale

jagti aankhon mein phir jate hain kya kya manzar

jab sarakti hai KHayalon ki rida sham Dhale

dastaken deti hai ehsas ke darwaze par

ek anjaan si be-nam sada sham Dhale

phir dabe panw chali aai kisi ki KHushbu

phir mahakne lagi kamre ki faza sham Dhale

ho na ye us ke taghaful ka kahin radd-e-amal

jagne lagti hai kyon meri ana sham Dhale

narm maKHmal ke bichhaune bhi na de pae 'nasim'

god mein man ki jo aata tha maza sham Dhale