jala jala ke diye pas pas rakhte hain

jalā jalā ke diye paas paas rakhte haiñ

ham apne aap ko aksar udaas rakhte haiñ

guloñ kā rañg phaloñ kī miThās rakhte haiñ

kuchh aadmī bhī shajar kā libās rakhte haiñ

unheñ bhī ḳhālī gilāsoñ kā TūTnā hai pasand

zarūr vo bhī koī zaḳhm-e-yās rakhte haiñ

jo log nek the shabnam se ho ga.e sairāb

vo kyā kareñ jo samundar kī pyaas rakhte haiñ

sukūt-e-āb pe kankar uchhāl kar ḳhush the

ab aaj paanī pe ghar kī asaas rakhte haiñ

jinhoñ ne abr ke saa.e kabhī nahīñ dekhe

vo regzār bhī phūloñ kī aas rakhte haiñ

havas kī naav badan ke bhañvar meñ Duub ga.ī

ham aise aur ka.ī iqtibās rakhte haiñ

jala jala ke diye pas pas rakhte hain

hum apne aap ko aksar udas rakhte hain

gulon ka rang phalon ki miThas rakhte hain

kuchh aadmi bhi shajar ka libas rakhte hain

unhen bhi KHali gilason ka TuTna hai pasand

zarur wo bhi koi zaKHm-e-yas rakhte hain

jo log nek the shabnam se ho gae sairab

wo kya karen jo samundar ki pyas rakhte hain

sukut-e-ab pe kankar uchhaal kar KHush the

ab aaj pani pe ghar ki asas rakhte hain

jinhon ne abr ke sae kabhi nahin dekhe

wo regzar bhi phulon ki aas rakhte hain

hawas ki naw badan ke bhanwar mein Dub gai

hum aise aur kai iqtibas rakhte hain