jala ke mujhko ajab moajiza dikhaya gaya

jalā ke mujh ko ajab mo.ajiza dikhāyā gayā

mirī hī raakh se paikar nayā banāyā gayā

mire hī tiir chalā.e ga.e mirī jānib

mire ḳhilāf mirā zor āzmāyā gayā

biThā ke pahle mujhe ik aziim mansab par

mire ḳhilāf ajab faisla sunāyā gayā

is āb-o-tāb ke pīchhe bhī ik kahānī hai

maiñ pahle sang thā phir aa.ina banāyā gayā

mujhe karā.ī ga.ī pahle ek shahr kī sair

phir us meñ mujh ko mirā asl ghar dikhāyā gayā

Dubo ke ḳhuun meñ bāñdhī ga.ī mujhe talvār

kis ehtimām se maiñ taḳht par biThāyā gayā

mujhe satā ke bhī kab ḳhush hue mire munkir

maiñ is pe ḳhush huuñ mirā sabr āzmāyā gayā

atā huī hai ajab tarah ḳhvājgī 'āsif'

tarāsh kar mire baazū alam thamāyā gayā

jala ke mujh ko ajab moajiza dikhaya gaya

meri hi rakh se paikar naya banaya gaya

mere hi tir chalae gae meri jaanib

mere KHilaf mera zor aazmaya gaya

biTha ke pahle mujhe ek azim mansab par

mere KHilaf ajab faisla sunaya gaya

is aab-o-tab ke pichhe bhi ek kahani hai

main pahle sang tha phir aaina banaya gaya

mujhe karai gai pahle ek shahr ki sair

phir us mein mujh ko mera asl ghar dikhaya gaya

Dubo ke KHun mein bandhi gai mujhe talwar

kis ehtimam se main taKHt par biThaya gaya

mujhe sata ke bhi kab KHush hue mere munkir

main is pe KHush hun mera sabr aazmaya gaya

ata hui hai ajab tarah KHwajgi 'asif'

tarash kar mere bazu alam thamaya gaya