jale hain dil na charaghon ne raushni ki hai

jale haiñ dil na charāġhoñ ne raushnī kī hai

vo shab-parastoñ ne mahfil meñ tīrgī kī hai

hadīs-e-zulm-o-sitam hai hanūz nā-gufta

hanūz mohr zabānoñ pe ḳhāmushī kī hai

us ek jaam ne saaqī kī jo atā Thahrā

sukūñ diyā hai na kuchh dard meñ kamī kī hai

hameñ ye naaz na kyuuñ ho ki nai-navāz haiñ ham

hamāre hoñToñ ne ījād naġhmagī kī hai

chaman meñ sirf hamīñ rāzdāñ haiñ kāñToñ ke

guloñ ke saath basar ham ne zindagī kī hai

firāq-e-yār ne baḳhshī hai vasl kī lazzat

ḳhayāl-e-yār ne zulmat meñ raushnī kī hai

haiñ jis kī diid se mahrūm aaj tak 'ḳhāvar'

usī kī ham ne tasavvur meñ bandagī kī hai

jale hain dil na charaghon ne raushni ki hai

wo shab-paraston ne mahfil mein tirgi ki hai

hadis-e-zulm-o-sitam hai hanuz na-gufta

hanuz mohr zabanon pe KHamushi ki hai

us ek jam ne saqi ki jo ata Thahra

sukun diya hai na kuchh dard mein kami ki hai

hamein ye naz na kyun ho ki nai-nawaz hain hum

hamare honTon ne ijad naghmagi ki hai

chaman mein sirf hamin raazdan hain kanTon ke

gulon ke sath basar hum ne zindagi ki hai

firaq-e-yar ne baKHshi hai wasl ki lazzat

KHayal-e-yar ne zulmat mein raushni ki hai

hain jis ki did se mahrum aaj tak 'KHawar'

usi ki hum ne tasawwur mein bandagi ki hai