jalwa-e-husn ko mahrum-e-tamashai kar

jalva-e-husn ko mahrūm-e-tamāshā.ī kar

be-niyāzī sifat-e-lāla-e-sahrā.ī kar

haañ baḌe shauq se shamshīr ke e.ajāz dikhā

haañ baḌe shauq se dāvā-e-masīhā.ī kar

maiñ to majbūr huuñ aadat se kahe jā.ūñgā

tū koī baat na sun aur na pazīrā.ī kar

apne bīmār kī ye āḳhirī ummīd bhī dekh

malak-ul-maut se kahtā hai masīhā.ī kar

mujh ko le jā ke dar-e-yār pe qāsid ne kahā

ḳhāma-farsā.ī na kar nāsiya-farsā.ī kar

ham tirī sūrat-e-inkār ko pahchānte haiñ

vo tabassum tū sharīk-e-lab-e-goyā.ī kar

jalwa-e-husn ko mahrum-e-tamashai kar

be-niyazi sifat-e-lala-e-sahrai kar

han baDe shauq se shamshir ke eajaz dikha

han baDe shauq se dawa-e-masihai kar

main to majbur hun aadat se kahe jaunga

tu koi baat na sun aur na pazirai kar

apne bimar ki ye aaKHiri ummid bhi dekh

malak-ul-maut se kahta hai masihai kar

mujh ko le ja ke dar-e-yar pe qasid ne kaha

KHama-farsai na kar nasiya-farsai kar

hum teri surat-e-inkar ko pahchante hain

wo tabassum tu sharik-e-lab-e-goyai kar